तीन दिवसीय ''लर्निंग लिंक्स'' उपक्रम उत्साहात
मालाड, ता. १३ (बातमीदार) : अदाणी फाउंडेशन, स्वाभिमान प्रकल्प, समृद्धी लोकसंचालित साधन केंद्र (मालाड) आणि राजयोग प्रतिष्ठान यांच्या संयुक्त विद्यमाने ‘लर्निंग लिंक्स’ हा महिलांसाठीचा तीन दिवसीय उद्योजकता विकास कार्यक्रम गुरुवारी (ता. १३) येथे उत्साहात पार पडला. विभागातील बचतगटातील महिलांना उद्योजकतेसाठी प्रशिक्षित करण्याच्या उद्देशाने दुर्गानगर मालाड पूर्वेत या कार्यक्रमाचे आयोजन करण्यात आले होते.
व्यावसायिक मार्गदर्शन, आधुनिक तंत्रज्ञान, मार्केटिंग, आवश्यक शासकीय कागदपत्रे आणि आर्थिक उलाढालीसंबंधी माहिती या विषयांवर सविस्तर प्रशिक्षण देण्यात आले. या कार्यक्रमाला स्थानिक महिलांनी उत्स्फूर्त प्रतिसाद दिला आणि अपेक्षेपेक्षा अधिक महिला सलग तीन दिवस उपस्थित राहिल्या. जास्तीत जास्त महिला उद्योजक निर्माण होईपर्यंत आमचा प्रयत्न थांबणार नाही. महिलांसाठी व्यासपीठ उपलब्ध करणे हीच खरी सेवा आहे, असे मत राजयोग प्रतिष्ठानचे अध्यक्ष राकेश शंकर धनावडे यांनी यावेळी व्यक्त केले.