सुरक्षित प्रभागासाठी सीसीटीव्ही यंत्रणा
कल्याण, ता.८ (वार्ताहर) : नागरिकांना स्वच्छ आणि सुंदर प्रभागासोबतच सुरक्षित वातावरण मिळावे, या उद्देशाने युवासेनेतर्फे पुढाकार घेण्यात आला आहे. युवासेना डोंबिवली शहर अध्यक्ष सागर जेधे यांनी आपल्या प्रभागात नागरिकांच्या सुरक्षेसाठी विविध ठिकाणी सीसीटीव्ही कॅमेरे बसविण्यास प्रारंभ केला आहे. कल्याण लोकसभेचे खासदार डॉ. श्रीकांत शिंदे यांच्या वाढदिवसानिमित्त या उपक्रमाची सुरुवात करण्यात आली.
प्रभाग अधिक स्वच्छ, सुरक्षित आणि शिस्तबद्ध व्हावा, यासाठी डोंबिवलीतील बॅडमिंटन कोर्टजवळ, जय मल्हार सोसायटी परिसर, डी.एन.सी. शाळेमागील भाग, देवकी निवास व अंबर कॅसल इमारतीजवळ, नील पद्मा हॉल व रॉयल वैलनसिया सोसायटी परिसरात सीसीटीव्ही कॅमेरे बसवण्यात येत आहेत.
प्रभाग स्वच्छ, सुंदर व सुव्यवस्थित ठेवण्यासाठी सर्व नागरिकांनी सहकार्य करावे, असे आवाहन सागर जेधे यांनी केले आहे.