मुंबई: मुंबईत कोरोना नियंत्रणात येत असल्याने पालिकेच्या केईएम नायर आणि सायन या तिन्ही प्रमुख रुग्णालयात नॉन कोविड रुग्णांसाठी 2,555 खाटा उपलब्ध करण्यात आल्या आहेत. पालिका आरोग्य विभागाच्या या निर्णयामुळे अन्य आजारांनी त्रस्त रुग्णांना दिलासा मिळाला आहे.

मार्च महिन्यात कोरोनाचा पहिला रुग्ण आढळला आणि पालिकेच्या कस्तुरबा रुग्णालयासह केईएम, नायर आणि सायन ही रुग्णालये कोविड रुग्णालये म्हणून जाहीर करण्यात आली होती. कोविड रुग्णालये केल्याने अन्य आजारांनी त्रस्त रुग्णांची उपचारासाठी परवड होत होती. मात्र, आता मुंबईत कोरोना नियंत्रणात येत असल्याने अन्य आजारांनी त्रस्त रुग्णांना योग्य उपचार मिळावे यासाठी खाटा उपलब्ध केल्या जात आहेत. केईएम रुग्णालयात - 975, सायन रुग्णालयात - 1000 आणि नायर रुग्णालयात -600 खाटा नॉन कोविड रुग्णांसाठी उपलब्ध करण्याचा निर्णय घेतला आहे.

केईएम रुग्णालयात एकूण 2,250 खाटा असून कोरोना बाधित रुग्णांची संख्या कमी होत असल्याने 975 खाटा अन्य आजारांनी त्रस्त रुग्णांसाठी उपलब्ध करण्यात आल्याचे केईएम रुग्णालयाचे अधिष्ठाता डॉ. हेमंत देशमुख यांनी सांगितले. 

अधिक वाचाः  रुग्णांची सेवा करणारे कोरोना योद्धे 'देवदूत', राज्यपालांचे गौरवोद्गार

कोरोना आटोक्यात येत असल्याने सायन रुग्णालयात नॉन कोविड रुग्णांसाठी खाटा उपलब्ध करण्यात येत आहेत. सायन रुग्णालयात एकूण 1,450 खाटा असून एक हजार खाटा नॉन कोविड रुग्णांसाठी उपलब्ध करण्यात आल्या आहेत. तर, कोरोना बाधित रुग्णांसाठी 300 खाटा उपलब्ध असल्याचे सायन रुग्णालयाचे अधिष्ठाता डॉ मोहन जोशी यांनी सांगितले.

अधिक वाचाः  'मुलूंड' ठरतेय कोरोनाचा हॉटस्पॉट, सात दिवसात एक हजार नव्या रुग्णांची भर

तर, नायर रुग्णालयात 600 खाटा नॉन कोविड रुग्णांसाठी उपलब्ध करण्यात आल्या आहेत. तर, नॉन कोविड रुग्णांवर उपचार करण्यासाठी 400 निवासी डॉक्टर 24 तास कार्यरत असून कोविड रुग्णांवर उपचार करण्यासाठी 700 निवासी डॉक्टर कार्यरत असल्याचे नायर रुग्णालयाचे अधिष्ठाता डॉ. रमेश भारमल यांनी सांगितले. 

----------------------

(संपादनः पूजा विचारे)

Two and a half thousand beds available non covid patients KEM Sion Nair hospital