ठाणे : लॉकडाऊन काळात संयम बाळगून असलेले नागरिक लॉकडाऊन शिथिल झाल्यानंतर कामानिमित्त बाहेर पडले आहेत. परंतू वाहतूकीची पुरेशी सोय नसल्याने प्रवाशांना दररोज अनेक अडचणींचा सामना करावा लागत आहे. प्रवाशांचा या संयमाचा बांध फुटल्याने पाच दिवसांपूर्वीच प्रवाशांनी नालासोपारा रेल्वे स्थानकात रेल रोको आंदोलन केले. या घटनेचे पडसाद मध्य रेल्वे मार्गावरील ठाणे, कल्याण, डोंबिवली परिसरातही उमटण्यास वेळ लागणार नाही अशी प्रतिक्रिया त्यावेळी नागरिकांनी व्यक्त केल्या होत्या. त्याच पार्श्वभूमीवर सोमवारी सकाळपासून व्हॉट्सअॅपवर एक व्हिडिओ व्हायरल होत आहे.
''नालासोपारा येथील रेल रोको आंदोलनाची पुनरावृत्ती अखेर डोंबिवली स्थानकात झाली. डोंबिवलीतील प्रवाशांनीही सोमवारी रेल रोको आंदोलन केले.'' असा मजकूर आणि त्यासोबत एक व्हिडीओ सकाळपासून समाज माध्यमावर व्हायरल होत आहे. ज्याच्या मोबाईलमध्ये हा व्हिडीओ येईल तो कोणतीही शहनिशा न करता केवळ पुढे फॉरवर्ड करत असल्याने दिवसभर डोंबिवलीत असे आंदोलन झाले का ? याचीच चर्चा केवळ डोंबिवलीत नाही तर मुंबईतही रंगली. मुंबईतील नागरिक डोंबिवलीकरांना हा व्हिडीओ पाठवून असे घडले का याचीच विचारणा करीत असल्याचे दिसून आले. परंतु हा व्हिडिओ पश्चिम रेल्वे स्थानकातील असून एका चुकीच्या संदेशामुळे दिवसभर हा व्हिडिओ धुमाकूळ घालत होता.
त्यासोबतच नालासोपारानंतर आता डोंबिवलीकरांचा संयम सुटला, अशा आशयाचा संदेशही व्हायरल होत आहे. डोंबिवली रेल्वे स्थानकात खरेच असे काही झाले का याची विचारणा नागरिक हा व्हिडिओ व्हायरल करुन करीत होते. दुपारनंतर तर मुंबईतही या व्हिडिओची चर्चा होऊ लागली. मुंबईतील नागरिक डोंबिवलीत असे काही झाले का? अशी विचारणा डोंबिवलीकरांना करु लागले. डोंबिवलीच्या नावे व्हिडिओ व्हायरल होत असल्यानेही अशी विचारणा होत असल्याचे निदर्शनास येत होते. परंतg डोंबिवलीत अशी कोणतीही घटना घडलेली नव्हती. त्यामुळे या प्रश्नांना उत्तर देता देता डोंबिवलीकरांच्याही नाकी नऊ आले होते.
डोंबिवली रेल्वे स्थानकात अशी कोणतीही घटना घडलेली नाही. व्हिडिओ आपण बारीक लक्ष देऊन पाहिल्यास रेल्वेवर WR (पश्चिम रेल्वे) असे लिहिलेले असल्याचे आपल्या लक्षात येईल. याचा अर्थ हा व्हिडीओ पश्चिम रेल्वे स्थानकातील आहे. नागरिकांनी व्हिडीओ व्हायरल करताना थोडी शहनिशा करत जावी. एका चुकीच्या संदेशामुळेही अनेक अफवा पसरु शकतात, याबाबत खबरदारी घेतली पाहिजे.
- सतिश पवार, वरिष्ठ पोलिस निरिक्षक, डोंबिवली रेल्वे पोलिस.
----
संपादन : ऋषिराज तायडे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.