मुंबई : महापौर म्हणजे शहराचे प्रथम नागरिक. शहरातील प्रत्येक शासकीय सोहळ्यात त्यांना मानाचे स्थान असते; पण आज मध्य रेल्वेच्या कार्यक्रमात महापौर किशोरी पेडणेकर यांच्या नावाचा उल्लेख नसल्याने त्या आल्या पावली परतल्या. नाराजी व्यक्त करून त्या कार्यक्रमाच्या ठिकाणाहून निघून गेल्याने चर्चेला उधाण आले होते.

हेही वाचा : ...म्हणून पहिल्याच दिवशी उशीरा धावली एसी लोकल

शिवसेनेचे खासदार अरविंद सावंत यांनी या संदर्भात भाषणात नाराजी व्यक्त केल्यानंतर रेल्वे राज्यमंत्री सुरेश अंगडी यांनी दिलगिरी व्यक्त केली. अशी चूक पुन्हा होणार नाही, असे आश्‍वासनही त्यांनी दिले. 

मध्य रेल्वेच्या ट्रान्स हार्बर मार्गावर पनवेल ते ठाणेदरम्यान पहिली एसी लोकल गुरुवारपासून (ता. 30) सुरू झाली. या लोकलचे रेल्वे राज्यमंत्री अंगडी यांनी व्हिडीओ कॉन्फरसिंगद्वारे उद्‌घाटन केले. या कार्यक्रमाला राजशिष्टाचाराप्रमाणे महापौरांनाही निमंत्रित करण्यात आले होते; पण व्यासपीठावर लावण्यात आलेल्या फलकावर; तसेच आसनासमोरील डायसवरही महापौरांचे नाव नव्हते. हे पाहून महापौर पेडणेकर नाराज होऊन निघून गेल्या. नंतर अरविंद सावंत यांनी हा प्रकार राज्यमंत्र्यांच्या लक्षात आणून दिला.

हेही वाचा : धक्कादायक : ट्रेलरच्या धक्क्याने पादचारी पूलच कोसळला

ही वातानुकूलित लोकल जेथून सुटते, त्या रायगड जिल्ह्यातील लोकप्रतिनिधीचेही नाव मंचावर नाही. एल्फिन्स्टन रोड दुर्घटनेनंतर बांधण्यात आलेल्या पुलासाठी मी अनेक वेळा पुढाकार घेऊनही या पुलावर कुठेही त्याचा उल्लेख नाही. रेल्वे अधिकारी वारंवार लोकप्रतिनिधींचा अपमान करीत असून अशा अधिकाऱ्यांवर कारवाई करावी, अशी मागणीही या वेळी सावंत यांनी केली; मात्र कारवाईचे कोणतेही आश्‍वासन न देता राज्यमंत्र्यांनी अधिकाऱ्यांची कानउघाडणी केली.