Mumbai Crime News: नवी मुंबईत 14 कोटींची फसवणूक झाल्याची घटना समोर आली आहे. एका महिलेने तिच्या अन्य तीन सहकाऱ्यांसोबत मिळून कोट्यवधींची फसवणूक केल्याचे पोलिसांचे म्हणणे आहे.

तक्रार दाखल झाल्यानंतर महिलेसह अन्य आरोपींविरुद्ध गुन्हा दाखल करण्यात आला आहे. पोलीस पथक या प्रकरणाच्या तपास करत आहेत.

पोलिसांनी सांगितले की, आरोपींनी जानेवारी ते मे 2023 या कालावधीत चिटफंडच्या माध्यमातून चांगला परतावा देण्याचे आश्वासन देऊन फसवणूक केली.

आरोपींनी घेतलेले पैसे परत केले नाहीत. गुंतवणूकदारांनी त्यांच्या पैशांची मागणी केली असता आरोपींनी वेळेवर पैसे परत केले नाहीत. बराच वेळ आरोपींनी गुंतवणुकदारांची फसवणूक केली.

गुंतवणुकदारांची 14.24 कोटी रुपयांची फसवणूक केल्याप्रकरणी एका महिलेसह चार जणांविरुद्ध गुन्हा दाखल करण्यात आल्याचे पोलिसांनी बुधवारी सांगितले. गुंतवणूकदारांच्या तक्रारीच्या आधारे पोलिसांनी उरण पोलीस ठाण्यात ही कारवाई केली.

चिट फंड काय आहे?

चिट म्हणजे वचनचिठ्ठी. बँकिंग व्यवहाराशी अत्यंत कमी संबंध येणाऱ्या असंघटित क्षेत्रातील गरजू व्यक्तींना आपल्या आर्थिक गरजा ताबडतोब भागवण्यासाठी निधी पुरविणारा स्रोत म्हणजेच चिट फंड. भिशीसारखाच बचतीचा हा प्रकार आहे.

चिट फंड गुंतवणुकीत धोका काय आहे?

कमी गुंतवणूक, सहज तारण विरहित कर्ज उपलब्धता या वैशिष्ट्यपूर्ण रचनेमुळे समान आचार-विचार असलेले छोट्या आकाराचे चिट फंड हे यशस्वी झाले असून यातील सभासदांना लाभांशरूपाने आपल्या गुंतवणुकीवर अधिक परतावा मिळत आहे.

मात्र या चिट फंड कंपन्यांमध्ये आता अनेक अनोळखी लोकांचा भरणा होऊन तेथे गैरव्यवहार होण्याचे प्रमाणही वाढले आहे.

हे थांबण्यासाठी चिट फंड कायदा 1982 यात सुचवलेल्या प्रस्तावित दुरुस्त्या चिट फंड कायदा 2019 (सुधारित) नुसार मंजूर झाल्या आहेत. यानुसार केंद्र सरकारने चिट फंड योजना अधिक सुरक्षित केल्या आहेत.