नांदेड : येथील गोदावरी नदी पात्रात ता. १३ जून रोजी दोन टनापेक्षा जास्त माशांचा मृत्यू  झाला होता. यानंतर महापालिका प्रशासन खडबडून जागे झाले. जिल्हाधिकारी डॉ. विपीन यांच्या समवेत पालिका आयुक्त डॉ. सुनील लहाने यांनी घटनास्थळी जाऊन पाहणी केली. माशांचा मृत्यू नेमका कशामुळे झाला हे काही समजत नसल्याने मृत माशांचा अहवाल येथील प्रादेशिक न्यायसहायक वैज्ञानिक प्रयोगशाळेत पाठविला होता. तपासणीनंतर माशांचा मृत्यू हा विषामुळे झाला नसल्याचा अहवाल प्राप्त झाला. आता मृत्यूचे कारण शोधण्याचेकाम प्रदूषण नियंत्रण मंडळाकडे आले आहे.

शहराच्या मध्यभागातून गोदावरी नदी वाहते. या नदी पात्राचे गेल्या काही दिवसांपासून प्रदूषण वाढले आहे. किंबहुना शहरातील जवळपास १९ नाल्याद्वारे सांडपाणी गोदावरी नदी पात्रात सोडल्याने नदी प्रदूषित झाली आहे. ता. १ जून रोजी गोवर्धन घाट ते नगीनाघाट दरम्यान मृत माशांचा खच आढळून आला. त्यानंतर एकच खळबळ उडाली. माहिती मिळताच महानगरपालिका प्रशासनाने याची मोजदाद केल्यानंतर दोन टन २७० किलो माशांचा मृत्यू झाला.

 हेही वाचा - आमदार, खासदारांसह अनेकजण धावले शेतकऱ्यांच्या मदतीला

जिल्हाधिकारी व आयुक्तांनी दिली होती भेट

जिल्हाधिकारी डॉ. विपीन आणि महापालिका आयुक्त डॉ. सुनील लहाने यांनी गोदावरी नदी पात्राला भेट देऊन पाहणी केली. माशांचा मृत्यू कशामुळे झाला याचा शोध लावण्यासाठी मृत माशांचा व पाण्याचे नमुने घेऊन नांदेडच्या फॉरेन्सिक लॅबला तपासणीसाठी पाठविण्यात आला होता. तपासणी अहवाल महापालिका प्रशासनाला प्राप्त झाला आहे.
 
महापालिकेचा कारभार जबाबदार

ता. पाच जून रोजी गोदावरी नदी प्रदुषणमुक्त करण्याची मागणी केली होती. परंतु गलिच्छ कार्यभार असलेल्या महापालिकेने दखल घेतली नसल्यामुळे आज हजारो मासेच नाही तर इतरही जलचर प्राणी मृत्यूमुखी पडले आहेत. परिणामी परिसरामध्ये दुर्गंधी पसरल्याने नागरिकांचेही आरोग्य धोक्यात आले आहे. विष्णुपूरी प्रकल्पातून पाणी सोडल्यामुळे प्रकल्पातील मासे गोदावरी नदी पात्रात आले होते. मात्र पात्रामध्ये ड्रेनेजचे पाणी सोडलेले असल्यामुळे तसेच २४ तास सॅनिटायझरचा वापर होत असल्याने नदी पात्र अधिकच प्रदुषीत झाले आहे. 

येथे क्लिक करा - बिलोली: लॉटरीच्या नावाखाली एकाला ५२ हजाराचा गंडा

विषामुळे माशांचा मृत्यू नाही

येथील प्रादेशिक न्यायसहायक वैज्ञानिक प्रयोगशाळेचा अहवाल प्राप्त झाला. गोदावरी नदी पात्रातील माशा ह्या विषामुळे मृत्यू पावलेल्या नाहीत. त्यामुळे मृत माशांचा तपासणी अहवाल प्रदुषण बोर्डाकडून येणे बाकी असल्याने त्यानंतरच मृत्यूचे नेमके कारण पुढे येईल असे सांगण्यात आले. 
- व्ही. एम. नवले, उपसंचालक, प्रादेशिक सहाय्यक वैज्ञानिक प्रयोगशाळा, नांदेड.