नांदेड - विभागीय आयुक्त सुनील केंद्रेकर यांनी दोन दिवसापूर्वीच मराठवाड्यातील कोरोना आजाराबद्दलचा आढावा घेत जिल्हाधिकारी, आयुक्त, मुख्य कार्यकारी अधिकारी, पोलिस अधीक्षक या सर्वांनी मिळुन योग्य ती खबरदारी घ्यावी, अशा सूचना केल्या होत्या. दरम्यान, गुरुवारी (ता. १८) जिल्ह्यातील कोरोना पॉझिटिव्ह रुग्णसंख्या दुपट्टीने वाढल्याचे दिसून आले आहे. 

कोरोनाबाधित रुग्णांच्या संपर्कातील व्यक्तींचे बुधवारी (ता. १७) स्वॅब तपासणीसाठी घेण्यात आले होते. त्यापैकी गुरुवारी (ता.१८) ६१९ अहवाल प्राप्त झाले. यामधील ५५८ निगेटिव्ह तर ५८ पॉझिटिव्ह आले आहेत. जिल्ह्यातील कोरोनाबाधित रुग्णांची संख्या २२ हजार ९८८ वर पोहचली आहे. 

हेही वाचा- मराठवाड्याची वॉटरग्रीड योजना महाआघाडीकडून बासनात गुंडाळल्याचा प्रविण दरेकर यांचा आरोप

५८ जणांचे अहवाल पॉझिटिव्ह

गुरुवारी महापालिका क्षेत्रात ३७, नांदेड ग्रामीण - दोन, भोकर - दोन, हिमायतनगर - एक, किनवट - पाच, बिलोली- एक, हदगाव - एक, मुदखेड- दोन, कंधार - एक, देगलूर - एक, पुणे- एक, हिंगोली -दोन, परभणी - एक व यवतमाळ एक असे ५८ जणांचे अहवाल पॉझिटिव्ह आले आहेत. विष्णुपुरी येथील डॉ. शंकरराव चव्हाण शासकीय रुग्णालयात उपचार सुरु असलेल्या भोकर येथील एका ७५ वर्षाच्या व्यक्तीचा उपचारादरम्यान मृत्यू झाला. जिल्हाभरात कोरोना आजाराने आतापर्यंत ५९१ जणांचे मृत्यू झाला आहे. 

हेही वाचा- नांदेडात अवकाळीचा बळी : सुजलेगाव येथे विज पडून मजूराचा मृत्यू

२८१ बाधितावर उपचार सुरु

गुरुवारी श्री गुरु गोविंदसिंघजी स्मारक जिल्हा शासकीय रुग्णालयातील - एक, महापालिकेंतर्गत गृहविलगीकरण कक्षात - २३, भोकर - एक, किनवट - एक, बिलोली - एक, हैदराबाद - एक व खासगी रुग्णालयातील सात असे ३५ रुग्ण कोरोनामुक्त झाल्याने त्यांना रुग्णालयातुन सुटी देण्यात आली. जिल्हाभरात सध्या २८१ बाधितावर उपचार सुरु असुन, त्यापैकी ११ बाधितांची प्रकृती गंभीर स्वरुपाची आहे. गुरुवारी रात्री उशिरापर्यंत ३९५ स्वॅबची चाचणी सुरु होती. 

नांदेड कोरोना मीटर ः

एकुण पॉझिटिव्ह - २२ हजार ९८८ 
एकुण बरे - २१ हजार ९०५ 
एकुण मृत्यू - ५९१ 
गुरुवारी पॉझिटिव्ह - ५८ 
गुरुवारी बरे - ३५ 
गुरुवारी मृत्यू - एक 
उपचार सुरु - २९५ 
गंभीर रुग्ण - ११ 
प्रलंबित स्वॅब - ३९५