नांदेड : नांदेड विभागातील साखर कारखान्यांकडे मागील वर्षीची थकीत एफआरपी रक्कम अद्याप प्रलंबित आहे. पेरणी अगोदर साखर कारखान्यांकडील थकित रक्कम शेतकऱ्यांना देण्यास प्रशासनाने भाग पाडावे अन्यथा प्रादेशिक साखर सहसंचालक कार्यालयासमोर ऊस उत्पादक शेतकऱ्यांना घेऊन आंदोलन करण्याचा इशारा शिवसेनेचे शेतकरी नेते प्रल्हाद इंगाेले यांनी निवेदनाद्वारे प्रशासनाला दिला आहे.

अनेक कारखान्याकडे थकली एफआरपी 
ऊस गाळपाला गेल्यानंतर पंधरा दिवसांत शेतकऱ्यांना एकरकमी एफआरपी देणे बंधनकारक असताना भाऊराव चव्हाण, पूर्णा, टोकाईसह नांदेड विभागातील बहुतांश कारखान्यांनी शेतकऱ्यांची एफआरपी रक्कम थकवली आहे. सध्या पेरणीचे दिवस असल्याने शेतकरी आर्थिक संकटात सापडले आहेत. कोरोना संकटाच्या काळातही कवडीमोल दराने शेतकऱ्यांना शेतमाल विकावा लागला होता. सध्या पेरणीचे दिवस तोंडावर आल्याने शेतकऱ्यांना त्यांचे पैसे मिळणे अत्यंत गरजेचे आहे. 

हेही वाचा....एक लाख ८० हजार क्विंटल धान्य खरेदी....कुठे ते वाचा

शेतीमालाचे दर पडल्याने शेतकरी अडचणीत
सध्या ऊस उत्पादक भागात मोठ्या प्रमाणात घेतल्या जाणाऱ्या हळदीचे दरही पडले आहेत. दहा ते बारा हजार रुपये क्विंटल विकणारी हळद सध्या पाच हजार ते सहा हजार क्विंटलपर्यंत खाली आल्याने शेतकरी अडचणीत आले आहेत. अशावेळी शेतकऱ्यांना उसाचे थकीत पैसे 
मिळाले तर पेरणीच्या कामाला येतील. यामुळे शेतकऱ्यांची येणे बाकी द्यावी असा आग्रह इंगोली यांनी धरला आहे.

हेही वाचलेच पाहिजे..... सोयाबीनच्या अधीक उत्पादनासाठी ‘अशी’ करा पेरणी

दहा जूनपर्यंत थकीत रक्कम द्यावी
यासाठी प्रशासनाने सर्व कारखान्यांना सक्त ताकीद देऊन या आठवड्यात दहा जून पर्यंत थकीत शेतकऱ्यांना तत्काळ द्यावी, अशी मागणी केली आहे. अन्यथा प्रादेशिक साखर सहसंचालक कार्यालया समोर ऊस उत्पादक शेतकऱ्यांना घेऊन आंदोलन करण्याचा इशारा प्रल्हाद इंगोले यांनी निवेदनाद्वारे दिला आहे. कारखान्यांनी उसाची रक्कम वेळेवर द्यावी, यासाठी त्यांनी मुबंइ उच्च न्यायालयाच्या औरंगाबाद खंडपीठात याचीका दाखल केली होती. यात अनेक कारखान्यांना थकीत एफआरपी द्यावी लागली होती. 

पालकमंत्र्यांनी कारखान्यापासून सुरुवात करावी 
जिल्ह्याचे पालकमंत्री अशोक चव्हाण कोरोना आजारातून  लवकर बरे व्हावेत यासाठी शेतकऱ्यासह सर्व नागरिकांनी प्रार्थना केली. दवाखान्यात उपचार घेत असतानाही त्यांनी त्यांच्या पक्षाच्या आदेशावरुन स्पीकअप इंडिया या अभियानात भाग घेतला होता. आता त्यांनी शेतकऱ्यांच्या विनंतीवरून त्यांच्या भाऊराव चव्हाण सहकारी साखर कारखान्याकडे असलेली थकीत एफआरपी देण्याची सुरुवात करुन पेरणी अगोदर शेतकऱ्यांना आधार द्यावा, असे आवाहन प्रल्हाद इंगोले यांनी केले आहे.