वाई बाजार ( जिल्हा नांदेड) : एकीकडे कोरोना महामारीने सर्वत्र हाहाकार माजविल्याने शासन आणि प्रशासन या जीवघेण्या आजारापासून नागरिकांच्या बचावासाठी विविध योजना अमलात आणत असले तरी नागरिकांकडून शासनाने लावून दिलेल्या त्रिसूत्रीचे पालन होताना दिसत नाही. मास्क, सॅनिटायझर, सोशल डिस्टन्स, याचे पालन पाहिजे तशे होत नसल्याने ही महामारी आवाक्याबाहेर गेली आहे. तर दुसरीकडे मात्र माहूर या आदिवासीबहुल तालुक्यातील दत्त मांजरी गावात अल्पशिक्षित, अशिक्षित शेळी पालन करणाऱ्या शेतकरी शेतमजुरांनी कोरोनापासून बचावासाठी चक्क बकऱ्यांना मास्क लावून त्यांची काळजी घेतली जात आहे.

माहूर तालुक्यातील दत्त मांजरी येथील गावकऱ्यांनी कोरोनाला हरवण्यासाठी एक बैठक घेऊन त्रिसूत्रीचे पालन करण्याची शपथ घेतली आहे. गावात कोरोनाचा फैलाव होऊ नये यासाठी सुरुवातीपासूनच गावकरी विशेष खबरदारी घेत आहेत. सरकारी नियमांचे पालन इथे काटेकोरपणे केले जात आहे. अशातच जनावरांना देखील कोरोना होईल या भीतीने गावकऱ्यांनी जनावरांना मास्क घालण्याचा निर्णय घेतला. बैठकीत ठरल्याप्रमाणे शेळ्यांना इथे मास्क घातला जातो. गोठ्यात बांधताना शेळ्यांना देखील अंतर ठेवून बांधले जाते आणि गोठ्यात सॅनिटायझरची फवारणी देखील केली जाते. शेळ्या चारायला नेताना गाव संपेपर्यंत मास्क काढला जात नाही. गावाबाहेर जंगलात मास्क काढला जातो आणि परत गावात येताना शेळ्यांना मास्क घातला जातो. या गावाची लोकसंख्या पंधराशे आहे. आतापर्यंत गावात दहाजणांना कोरोनाची लागण झाली. त्यामुळे गावकऱ्यांमध्ये कोरोनाबाबत भीती पसरली आहे. याच भीतीतून गावकऱ्यांनी जनावरांना देखील मास्क घालण्याचा निर्णय घेतला आहे.

हेही वाचा - वसमतमध्ये बंदचे आदेश डावलणाऱ्या आडत व्यापाऱ्यांना ४३ हजारांचा दंड

प्राणी नियम पाळत आहेत ते आपण ही पाळायला पाहिजे!

सध्या राज्यामध्ये विशेषतः नांदेड जिल्ह्यात कोरोनाचा मोठ्या प्रमाणात प्रादुर्भाव होत आहे. माहूर तालुक्यात सुद्धा हा प्रादुर्भाव बऱ्याच प्रमाणात आहे. हा तालुका आदिवासी, बंजारा बहुल असून या दत्तमांजरी या गावात बहुतांश नागरी आदिवासी जमातीचे असून त्यांनी मास्क, सॅनिटायझर व सोशल डिस्टन्स चा व्यवस्थित वापर केल्याने या गावात पॉझिटिव्ह रुग्णांची संख्या खूप कमी आहे. सोबतच बघण्यात आले आहे की पाळीव प्राणीसुद्धा सोशल डिस्टंसिंग घेऊन चरायला जातात. ही अतिशय चांगली बाब आहे. जे प्राणी नियमाप्रमाणे वागत आहे, तसे आपणही नियम पाळले पाहिजे.

- राकेश गिड्डे, तहसीलदार, माहूर.

बैठक घेऊन घेतला निर्णय...

शहरी भागा पाठोपाठ ग्रामीण भागातील मोठ्या प्रमाणात कोरोनाचे संक्रमण वाढले असल्याने आम्ही गावकऱ्यांनी एक बैठक घेऊन जनावरांना मास्क लावणे, त्यांना चारा पाणी देण्यापूर्वी परिसर सॅनिटायझर करणे, सोशल डिस्टंसिंगवर जनावरांना बांधणे हा निर्णय घेतला असेल मनुष्य बोलू शकतो पण जनावरांना वाचा नसल्याने ती बोलू शकत नाही. यासाठी आम्ही गावकऱ्यांनी ही काळजी घेतली आहे.

- मनोज कीर्तने, सामाजिक कार्यकर्ते, दत्तमांजरी, ता. माहूर.

संपादन- प्रल्हाद कांबळे