नांदेड : नांदेड (Nanded) शहरासह जिल्ह्यात मंगळवारी (ता.३१) दुपारी चार ते पाचच्या दरम्यान पावसाने हजेरी लावली. काही ठिकाणी वादळीवाऱ्यासह जोरदार पाऊस झाला. त्यामुळे वातावरणात गारवा निर्माण झाला होता. शहरात चारच्या सुमारास विजांच्या कडकडाटासह पावसाचे आगमन झाले. वादळी वाऱ्यासह पाऊस सुरू झाल्याने सिडको भागात अनेक झाडे रस्त्यावर उन्मळून पडली. (Nanded Rain Updates Showers In City And District)

सिडको भागात झाड पडल्याने एका रिक्षासह कार व दुचाकीचे नुकसान झाले. जिल्ह्यात उमरी शहरातही भर दुपारी तीनच्या सुमारास जोरदार पावसाने हजेरी लावली. पाऊणतास पाऊस पडला. उमरीचा मंगळवारी आठवडी बाजार असल्याने त्यात पावसाने हजेरी लावल्याने अनेकांचे नुकसान झाले. जिल्ह्यात बारूळ, कुरूळा, नायगाव आदी भागातही पाऊस झाला. माहूरला ढगाळ वातावरण होते.