नांदेड : मासिक पाळी हा जरी नैसर्गिक संक्रमणाचा काळ असला तरी त्या काळातील स्वच्छता, पोषक आहार आणि आरोग्याविषयी घावयाच्या काळजीचा अभाव आजही समाजात मोठ्या प्रमाणात आहे. शालेय शिक्षण पद्धतीत अंतर्भूत नसलेल्या आणि लज्जेची बाब समजून उघडपणे न बोलल्या जाणाऱ्या या आरोग्यविषयक बाबीला उघडपणे बोलणे हि काळाची गरज आहे. आणि याच उद्देशाने महिला व मुलींचे आरोग्य या विषयावर सातत्त्याने मराठवाड्यात काम करत असलेल्या शुभंकरोती फाऊंडेशन या सामाजिक संस्थेच्या पुढाकारातून ‘स्वच्छतेतून स्वयंरोजगाराकडे’ या महिला स्वयंरोजगार कार्यक्रमाची सुरुवात करण्यात आली आहे.

जिल्ह्यातील २५० गावातील महिलांना लाभ
महिला व मुलींच्या आरोग्यासाठी पूरक अशा उच्च दर्जाच्या सॅनेटरी पॅडचा निर्मिती प्रकल्प शुभंकरोती फाऊंडेशन तर्फे देसाई फाऊंडेशन यांच्या संयुक्त विद्यमाने उभारण्यात आला आहे. ना नफा ना तोटा या धर्तीवर उभारल्या जाणाऱ्या या प्रकल्पाच्या माध्यमातून नांदेड जिल्ह्यातील २५० गावातील महिलांना मासिक पाळीतील स्वच्छता, पोषक आहार, आरोग्याविषयी घावयाच्या काळजी आणि ग्रामीण भागात आज उपलब्ध नसलेल्या उच्च दर्जाच्या सॅनेटरी पॅडचा महिला स्वयंरोजगारांमार्फत पुरवठा ‘स्वच्छतेतून स्वयंरोजगाराकडे’ या उपक्रमांतर्गत केला जात आहे. आणि याचाच भाग म्हणून कोरोना संक्रमणामुळे रोजगार बुडालेला महिलांना या अडचणीच्या काळातही मासिक पाळीतील स्वच्छता ठेवण्यासाठी लक्ष्मीपती महिला स्वयंसहायता बचत गटाच्या माध्यमातून महिलांना सॅनेटरी पॅडचे वाटप करण्यात आले.

हेही वाचा....तेवीस हजार नागरिकांना टॅंकरने पाणीपुरवठा......कुठे ते वाचा

शिक्षित करून स्वयंरोजगाराच्या दिशेने वाटचाल
अपुरी जागा, वाढत्या धावपळीमुळे वेळेचा आणि स्वछतेचा अभाव, मासिक पाळीभोवती असलेला लज्जा आणि न बोलण्याचा विळखा ग्रामीण भागांपासून ते शहरी भागांपर्यंत सगळीकडेच कायम असल्याने त्याबाबतची स्वच्छता फारशी पाळली जात नाही त्यामुळे ‘स्वच्छतेतून स्वयंरोजगाराकडे' हा उपक्रम केवळ सॅनेटरी पॅड उपलब्धता यापुरता मर्यादित नसून ग्रामीण भागातील महिला व मुलींना मासिक पाळीचे संपूर्ण नियोजन जसे, मासिक पाळीची नैसर्गिक प्रक्रिया, मासिक पाळीतील स्वच्छता, अस्वछतेमुळे होणारे जंतूसंसर्ग, आवश्यक आहार आणि व्यायाम याबाबत शिक्षित करून त्यांना स्वयंरोजगाराच्या दिशेने घेऊन जाणे या मुख्य उद्देशावर सुरु करण्यात आला आहे.

हेही वाचलेच पाहिजे.... ‘या’ भागातील पन्नास वर्षावरील नागरिकांची होणार तपासणी

अल्प दरात उच्च दर्जाचे सॅनेटरी पॅड उपलब्ध
यावेळी शुभंकरोती फाऊंडेशनचे अध्यक्ष किरण चौधरी व संस्थेच्या प्रकल्प सहाय्यक रोहिणी वाघमारे, बचत गटाच्या अध्यक्ष नीता जोशी यांच्या हस्ते महिला सॅनेटरी पॅड वाटप करण्यात आले. लक्ष्मीपती महिला स्वयंसहायता बचत गटाच्या माध्यमातून महिलांना अल्प दरात उच्च दर्जाचे सॅनेटरी पॅड उपलब्ध करून देण्यासाठी बचत गटाच्या अध्यक्ष नीता जोशी, सुनीता पवार, आशा दवे, अश्विनी देशमुख, अनिता रापते, स्नेहा पवार, संगिता तिडके, मोनिका तिडके, विद्या पवार, योजना पवार, सविता पांचाळ, उज्वला शिंदे, योगिता कंडाळकर, चंद्रकला गुडमलवार, नीता घाटोळ, मीना पवार व प्रतिभा पवार या सर्व महिला परिश्रम घेत आहेत.