नांदेड : नांदेड (Nanded) येथील बांधकाम व्यावसायिक संजय बियाणी (Sanjay Biyani Murder Case) यांची गोळ्या घालून हत्या केल्यानंतर घरी निनावी पत्र (Letter) पाठवणाऱ्या आरोपीला अटक करण्यात आली आहे. धर्माबाद येथील आटाळा येथून ७४ वर्षीय विठ्ठल सूर्यवंशी याला पोलिसांनी ताब्यात घेतले आहे.

मिळालेल्या माहितीनुसार, बियाणी यांच्या हत्येनंतर पोलिस विभागाकडून विविध यंत्रणेमार्फत तपास सुरु असताना विठ्ठल सूर्यवंशी याच्याविषयी सुगाव लागला. सूर्यवंशीचा गावातील पांडुरंग येवले या व्यक्तीशी शेतीच्या कारणावरुन वाद होता. येवले यांना गुन्हात अडकवण्यासाठी खोडसाळपणाने पत्र पाठवल्याची कबुली सूर्यवंशीने दिल्याचं समोर आलं आहे. तसेच या पत्रातून बियाणींना जीवे मारण्याचा प्लॅन परभणीत झाल्याचा दावा करण्यात आला होता. हे निनावी पत्र स्पीड पोस्टने आलं होतं, तर पत्रात लिहिलेला मजकूर हिंदी भाषेत होता. या पत्रात रेती माफियाचाही उल्लेख करण्यात आला होता.

काय होतं पत्र?

बियाणी साब को ठोकनेका मनसुबा परभणी में हुवा, जिसमे आनंद नगर से बहुत बडा दादा पांडुरंग येवले परभणी आया था…. जिसेने पहले गोरठेकर के बच्चे को मारा था, जो आताळा का रेती माफिया है, अभी भी डरसे कोई ऊसे बात नही करते… अशा आशयाचे निनावी पत्र संजय बियाणी यांच्या घरी स्पीड पोस्टने आले होते.

नेमक काय प्रकरण

नांदेड येथील माहेश्वरी समाजाचे प्रसिध्द बांधकाम व्यावसायिक संजय बियाणी यांची ५ एप्रिलला भरदिवसा त्यांच्या राहत्या घराजवळच काही अज्ञात गुंडांनी गोळ्या झाडून निर्घृणपणे हत्या केली. खंडणी वसुलीच्या कारणावरुन त्यांची हत्या झाल्याचा प्राथमिक अंदाज वर्तवला जात आहे, तर सुपारी देऊन पतीची हत्या झाल्याचा आरोप बियाणींच्या पत्नीने केला आहे.