नांदेड : लॉकडाउनचे सगळे टप्पे उद्या संपत आहेत. त्यामुळे आता सगळ्याच स्तरावर नियम शिथिल झाले आहे, पण शाळा सुरू करायची कशी? या अवघड महत्वाच्या प्रश्नाचे उत्तर शोधण्याच्या मागावर असलेल्या शिक्षण विभागाचे तळ्यात- मळ्यात सुरू आहे. जून (ता.१५) पासून शाळा सुरू करण्याच्या हालचाली सुरू असल्यातरी यंदा वेळेत शाळा सुरू होतील, याची शंका आहे. 

सध्यातरी ऑनलाइन शाळा सुरू करणे हा पर्याय पुढे आला असला तरी, ग्रामीण भागात सरकारी शाळेत शिक्षण घेणाऱ्या विद्यार्थ्यांच्या सामान्यवर्गाच्या पालकांकडे अद्याप ॲन्डरॉईड मोबाईलच नाही. त्यामुळे ऑनलाइन शाळांचे कोडे उलगडण्याचे आव्हान शिक्षण विभागासमोर आहे. 

खासगी शाळा वगळल्या तर ग्रामीण भागात आजही बहुतांश शाळांमध्ये इंटरनेटची सुविधा नाही. विद्यार्थी, पालकांकडे घरी इंटरनेट असेलच असे नाही. त्यातही इंटरनेट स्पीड, डेटा अशा अनेक तांत्रिक बाबी आहेत. याशिवाय शालेय शिक्षण विभागाकडे डिजीटल अभ्यासक्रम उपलब्ध नाही. शाळांमध्ये भौतिक सुविधांचा अभाव अशा अवस्थेत ऑनलाइन शाळा सुरु करण्याची चाचपणी करण्यात येत आहे. 

हे ही वाचा -  विनाअनुदानित शाळांचे शिक्षक हवालदिल, कशामुळे? ते वाचलेच पाहिजे

 ऑनलाइन शिक्षणाचा पर्याय जाहीर करण्यापूर्वी शिक्षण विभागाने कसलीच तयारी केलेली नाही. व्यवस्थापन समित्या, शिक्षक, पालक, संस्थाचालकांना विश्वासात घेतले नाही. डिजीटल शिक्षणासाठी लागणारी यंत्रणा उपलब्ध नाही. त्याची पूर्वतयारी शिक्षण विभागाने काय केली? हे प्रश्न अधांतरीच आहेत. ऑनलाइन शाळेसाठी किमान शाळास्तरावर नियंत्रणकक्षाची आवश्यकता भासणार आहे. त्यासाठी विज जोडणीपासून संगणकापर्यंत अशा तांत्रिक बाबींचे काय? असा प्रश्न निर्माण होत आहे. 

शिक्षण विभागाकडून ऑनलाइन शाळा सुरू करण्यासंदर्भात शासनस्तरावरुन ठोस निर्णय प्राप्त नसले तरी जिल्ह्यात मात्र चाचपणी सुरू आहे. शाळातील भौतिक सुविधांची तपासणी यातून समोर येणाऱ्या उणिवांवर पर्याय शोधण्यात येत आहेत. शाळास्तरावर मोजक्या पालकांशी चर्चेद्वारे शाळा, शिक्षक व विद्यार्थी यापैकी कोणाचीच ऑनलाइन शाळेसाठी तयारी नसल्याचे समोर येत आहे. 

येथे क्लिक करा - नांदेडच्या गोदावरीची अशी आहे चित्तरकथा, कशी? ते वाचाच

जागतिक महामारीच्या आरोग्य संकटापुढे शिक्षण थांबवता येणार नाही, ते आपल्या जीवनाचा किंबहुना विद्यार्थी जीवनातील अविभाज्य भाग आहे. त्यामुळे कोरोनाचे संकट कितीही गंभीर असले तरी त्यातुन मार्ग काढण्यासाठी शिक्षण विभागासह यंत्रणा कामाला लागली आहे. 

शासनाच्या मार्गदर्शक सुचनांनुसार ऑनलाइन शाळा हा पर्याय समोर ठेवून जिल्ह्यातील शाळांचा भौतिक आढावा घेण्यात येत आहे. शासनस्तरावरुन ऑनलाइन शाळा सुरू करण्याबाबत अद्याप आदेश नाहीत. 
प्रशांत दिग्रसकर : शिक्षणाधिकारी (प्राथमिक)