कोगनोळी : येथील राष्ट्रीय महामार्गावर (National HighWay) रविवारी (ता. 19) रात्री आठ वाजता दुचाकीला अपघात (Accident) झाला होता. या अपघातात अंकली (ता. चिक्कोडी) येथील अभिजीत अण्णासाहेब माने (वय 40) हा गंभीर जखमी झाला होता. त्याला उपचारासाठी कागल येथील शासकीय रुग्णालयात (Government Hospital) नेण्यात आले होते. पण त्याचा वाटेतच मृत्यू झाल्याचे डॉक्टरांनी (Doctor) सांगितले.

याबाबत अधिक माहिती अशी की, अभिजीत माने हे शेती व्यवसाय करत होते. कोल्हापूरहून अंकलीला जाण्यासाठी निपाणीच्या दिशेने जात होते. येथील कोगनोळी फाट्यावर पोलिसांच्या वतीने लावण्यात आलेल्या बॅरिकेटला त्यांच्या दुचाकीची जोरात धडक बसली. या अपघातात अभिजित माने हे गंभीर जखमी झाले होते. त्यांना तात्काळ कागल येथील रुग्णालयात नेण्यात आले, पण त्यांचा वाटेतच मृत्यू झाला.

घटनास्थळी कोगनोळी पोलिस ठाण्याचे एएसआय एस. ए. टोलगी, राजू गोरखनावर, अमर चंदनशिव यांनी भेट देऊन पाहणी केली. अभिजित माने यांच्या मागे आई, वडील, पत्नी, दोन मुली असा परिवार आहे. उत्तरीय तपासणी केल्यावर मृतदेह नातेवाईकांच्या ताब्यात दिला. त्यानंतर शोकाकुल वातावरणात अंत्यसंस्कार करण्यात आले.