सांगली : बेडग (ता. मिरज) येथील डॉ. बाबासाहेब आंबेडकर यांच्या नावाची कमान (Babasaheb Ambedkar Arch Dispute) पाडल्याबद्दल सरपंच, सदस्य आणि ग्रामविकास अधिकारी यांना बजावलेली नोटीस नियमानुसारच आहे. त्याबाबत सात दिवसांत खुलासा करून बाजू मांडावी, अशा सूचना मुख्य कार्यकारी अधिकारी तृप्ती धोडमिसे यांनी दिल्या.

बेडगमधील डॉ. आंबेडकर यांचे नाव असलेली कमान पाडण्यात आल्यानंतर आंबेडकरी समाजाच्यावतीने जिल्हा परिषदेचे मुख्य कार्यकारी अधिकारी यांच्याकडे लेखी तक्रार दिली होती. त्यावर मुख्य कार्यकारी अधिकाऱ्यांनी (Trupti Dhodmise) चौकशी अधिकाऱ्यांची नियुक्ती करुन अहवाल मागविला होता.

तक्रारीत असलेल्या मुद्यांनुसार ग्रामपंचायतीकडे उपलब्ध असलेल्या कागदपत्रांची तपासणीही करण्यात आली होती. यामध्ये ग्रामपंचायतीने पाडलेल्या कमानीबाबत काही त्रुटी आढळून आल्याचे स्पष्ट झाले होते.

चौकशी अहवालानुसार, अतिक्रमणमध्ये केलेली कारवाई ही ग्रामपंचायत अधिनियमातील कलम ५२ (२अ) व ५३(१) नुसार सदोष असल्यामुळे संबंधित ग्रामपंचायत सरपंच व सर्व सदस्य, तत्कालिन व विद्यमान ग्रामविकास अधिकाऱ्यांना नोटीस बजावण्याची कारवाई जिल्हा परिषद प्रशासनाने केली.

याबाबत सात दिवसांत खुलासा करण्याचे आदेश दिले आहेत. मात्र, जिल्हा परिषदेने बजावलेल्या नोटिसा अन्यायकारक असल्याचा आरोप केला जात आहे. यावर नोटिसा नियमानुसारच आहेत. त्याबद्दल खुलासा करण्याचे आदेश दिले आहेत. जो काही असेल तो खुलासा करावा, अशा सूचना धोडमिसे यांनी दिल्या आहेत.