आरग : बेडग येथील प्रकाश वाळेकर यांनी चार दिवसांपासून अन्नत्याग केला असून, आरक्षण मिळत नाही तोपर्यंत बेमुदत उपोषण करण्याचा निर्णय घेतला आहे. दरम्यान, काल (ता. १) जिल्हाधिकारी डॉ. राजा दयानिधी बेडग येथून आरगच्या दिशेने जात असल्याचे समजताच सकल मराठा समाजाने (Maratha Community) बेडग - मिरज रस्त्यावर त्यांना घेराओ घातला.

येथील छत्रपती संभाजी महाराज चौकात त्यांची मोटार अडविली. यावेळी अन्नत्याग केलेल्या प्रकाश वाळेकर यांना भेटण्याची विनंती जिल्हाधिकाऱ्यांना केली; परंतु जिल्हाधिकाऱ्यांनी त्यांना भेटण्यास नकार दिला. त्यामुळे मराठा समाज आक्रमक झाला. यामुळे पोलिसांची मात्र तारांबळ उडाली. पोलिसांनी कार्यकर्त्यांना अडवण्याचा प्रयत्न केला; परंतु कार्यकर्त्यांनी मोटारीसमोरच बसून घोषणा दिल्या.

बेमुदत उपोषण करणाऱ्या वाळेकर यांनी अन्नत्याग केल्याने त्यांना अशक्तपणा जाणवत होता. त्यांना उभे राहता येत नसल्याने जिल्हाधिकाऱ्यांनी त्यांना भेटावे, अशी विनंती कार्यकर्त्यांनी केली; परंतु जिल्हाधिकाऱ्यांनी भेटण्यास नकार देताच संतप्त कार्यकर्त्यांनी वाळेकर यांना बेडसह उचलून जिल्हाधिकाऱ्यांच्या मोटारीसमोर आणून जिल्हाधिकाऱ्यांना निवेदन दिले.