सातारा : मूल होत नसल्याने अघोरी विद्येबरोबर करणी काढण्यासाठी मुंबईतील कुटुंबीयांकडून 21 लाख रुपये घेऊन फसवणूक केल्याप्रकरणी भोंदूबाबावर वाई पोलिस ठाण्यात गुन्हा दाखल झाला होता. स्थानिक गुन्हे शाखेच्या पथकाने साताऱ्यातील रविवार पेठेतून सापळा रचून ताब्यात घेतले. गणेश विठोबा शिंदे (रा. चांदवडी, ता. वाई) असे संबंधित भोंदूबाबाचे नाव आहे.
 
बोपर्डी (ता. वाई) येथील कुटुंबीय मुंबईत वास्तव्यास होते. त्यांना मूल होत नसल्याने ते उपचार घेण्यासाठी बोपर्डी येथे त्यांच्या मूळगावी आले होते. डॉक्‍टरकडून उपचार घेऊनही काहीच फरक पडत नव्हता. त्यामुळे चांदवडीतील भोंदूबाबा (देवऋषी) गणेश शिंदे याची त्यांना माहिती मिळाली. हे कुटुंबीय शिंदेकडे गेले. त्या वेळी त्याने तुमच्या कुटुंबावर घरातीलच कोणी तरी करणी केली आहे. त्यामुळे तुम्हाला त्रास होत असल्याचे सांगितले. यातून मुक्ततेसाठी त्यांना अघोरी विद्या व करणी काढून टाकावी लागेल, असेही सांगितले. या कामासाठी खूप खर्च करावा लागेल, असेही त्याने सांगितले. यासाठी त्याने संबंधित कुटुंबीयांकडून वेळोवळी 21 लाख रुपये घेऊन त्यांची फसवणूक केली.

या संदर्भात संबंधित कुटुंबीयाने वाई पोलिस ठाण्यात भोंदूबाबाविरोधात फसवणूक व अंधश्रद्धा निर्मूलन कायद्याखाली गुन्हा दाखल केला होता. पोलिस अधीक्षक तेजस्वी सातपुते यांनी घटनेचे गांभीर्य ओळखून संशयितास तातडीने अटक करण्याची सूचना स्थानिक गुन्हे शाखेचे पोलिस निरीक्षक सर्जेराव पाटील यांना केली होती. त्यानुसार त्यांनी सहायक पोलिस निरीक्षक डॉ. सागर वाघ यांच्या पथकाला संशयिताला अटक करण्याचे आदेश दिले होते. संबंधित भोंदूबाबाचा ठावठिकाणा शोधताना त्यांना गोपनीय बातमीदारांकडून हा भोंदूबाबा सातारा शहरातील रविवार पेठेत असल्याची माहिती मिळाली. त्यानुसार सापळा रचून गणेशला ताब्यात घेतले. श्री. वाघ यांच्या नेतृत्वाखाली संतोष पवार, नितीन गोगावले, प्रमोद सावंत, संजय जाधव यांनी ही कारवाई केली.

नक्की वाचा : गड किल्ल्यांवर जाण्यापुर्वी हे करा

हेही वाचा : शिवसेनेच्या माजी खासदारांचे पुण्यात निधन

वाचा : या 15 एटीएममधून 25 लाखांवर डल्ला

ब्रेकिंग : यात्रा समितीवर राज्यात पहिला गुन्हा दाखल