सांगलीतील विजापूर-गुहागर मार्गावर भीषण अपघात झाला आहे. या अपघातात पाच जणांचा मृत्यू झाला आहे. तर एक जण जखमी झाला आहे. विजापूर-गुहागर राज्य मार्गावर जतपासून 5 किलोमीटर अंतरावर असलेल्या अमृतवाडी फाट्याजवळ स्विफ्टकारने समोरून येणाऱ्या ट्रकला चुकवण्यासाठी उभ्या असलेल्या डंपरला धडक दिल्यामुळे भीषण अपघात झाला. एकाच कुटुंबातील पाच जणांचा मृत्यू झाला आहे.

गाणगापूरवरुन दर्शन घेऊन विजयपुर मार्गे जतकडे येत असताना हा अपघात रात्री साडेदहा वाजण्याच्या सुमारास घडला आहे. या अपघातात कार चालक दत्ता हरीबा चव्हाण (वय वर्षे 40), नामदेव पुनाप्पा सावंत (वय वर्षे 65) , पदमिनी नामदेव सावंत (वय वर्षे 60) , श्लोक आकाशदिप सावंत (वय वर्षे 8) मयुरी आकाशदिप सावंत (वय वर्षे 38) यांचा मृत्यू झाला आहे.

हे चौघे जण एकाच कुटुंबातील असुन आजी, आजोबा सून व नातू यांचा मृत्यू झाला आहे. या अपघातात वरद सावंत हा दहा वर्षाचा मुलगा गंभीर जखमी झाला आहे.

अपघात झाला तेव्हा आई मयुरी सावंत व मुलगा वरद सावंत हे दोघेजण जखमी अवस्थेत असल्यामुळे त्यांना ग्रामीण रुग्णालयात उपचारासाठी हलविण्यात आले. वरद यास तातडीने पुढील उपचारासाठी सांगलीला नेण्यात आले. भाड्याने कार घेऊन ते देवदर्शनासाठी गेले होते. चालक म्हणुन दत्ता चव्हाण एकाच कुटुंबातील चारजण रहिवाशी आहेत.

चार जणांचे मृतदेह जत ग्रामीण रुग्णालयात शविच्छेदनासाठी आणण्यात आले. चालक दत्ता हा जखमी होता. त्यास उपचारांसाठी नेत असताना वाटेतच मृत्यू झाला. मोठा अपघात घडल्याने बघ्यांची मोठी गर्दी झाली होती. जत ग्रामीण रुग्णालयात देखील मोठी गर्दी झाली होती. पोलिस निरीक्षक राजेश रामआघरे यांनी तातडीने भेट देऊन घटनास्थळी भेट दिली.