पंढरपूर (जि. सोलापूर) : मुंबई येथे 23जानेवारी रोजी होणाऱ्या महाराष्ट्र नवनिर्माण सेनेच्या अधिवेशनाला सोलापूर जिल्ह्यातून सुमारे पाच हजार पाचशे कार्यकर्ते उद्या (ता. 22) मुंबईला जाणार आहेत. कार्यकर्त्यांना जाण्यासाठी खासगी बसगाड्यांची व्यवस्था केली आहे, अशी माहिती मनसेच्या सहकार परिषदेचे प्रदेशाध्यक्ष दिलीप धोत्रे यांनी आज पत्रकार परिषदेत दिली. 

हेही वाचा - बारावीच्या परिक्षेवर बहिष्कार, गुरूवारी परिक्षा मंडळावर मोर्चा 

श्री. धोत्रे म्हणाले की, राज ठाकरे यांनी स्थापन केलेल्या महाराष्ट्र नवनिर्माण सेनेच्या स्थापनेला 23 जानेवारी रोजी 13 वर्षे पूर्ण होत आहेत. या निमित्ताने पक्षाच्या वाटचालीचे सिंहावलोकन करण्यासाठी मुंबईत अधिवेशन भरविण्यात आले आहे. या अधिवेशनासाठी राज्यभरातून लाखो मनसेचे पदाधिकारी व कार्यकर्ते उपस्थित राहणार आहेत. सोलापूर जिल्ह्यातून मोठ्या संख्येने मनसेचे कार्यकर्ते अधिवेशनाला जाणार आहेत. 

हेही वाचा - मराठा सेवा पतसंस्थेत चाललंय तरी काय? 

दोन दिवसांपासून जिल्ह्यातील पदाधिकारी व कार्यकर्ते अधिवेशनाची तयारी करत आहेत. प्रत्येक तालुक्‍यातून किमान पाचशे कार्यकर्ते जाणार आहेत. जिल्ह्यातून सुमारे पाच हजाराहून अधिक कार्यकर्ते उद्या मुंबईकडे रवाना होणार आहेत. प्रत्येक तालुक्‍याच्या ठिकाणाहून कार्यकर्त्यांसाठी खासगी बस गाड्यांची व्यवस्था करण्यात आल्याचेही श्री. धोत्रे यांनी सांगितले. यावेळी मनसेचे तालुका अध्यक्ष शशिकांत पाटील, अनिल बागल, सिद्धेश्वर गरड, श्री. मासाळ आदी उपस्थित होते.