याप्रकरणी गुजरातमधील संशयित ठकसेनाविरुद्ध जत पोलिस ठाण्यात फसवणुकीचा गुन्हा दाखल झाला
मिरज : जतमधील (Jat) एका सामान्य व्यक्तीच्या कागदपत्रांद्वारे केंद्रीय जीएसटी (GST) विभागाची तब्बल पस्तीस लाख रुपयांच्या फसवणुकीचा प्रकार मिरज (Miraj) येथील केंद्रीय जीएसटी विभागाने उघडकीस आणला आहे. याप्रकरणी गुजरातमधील (Gujrat) संशयित ठकसेनाविरुद्ध जत पोलिस (Jat police) ठाण्यात फसवणुकीचा गुन्हा दाखल झाला आहे.
याबाबत मिळालेली माहिती अशी गुजरातमधील या संशयित ठकसेनाने जतमधील एस. एन. चौगुले या सामान्य शेतमजुराचे आधारकार्ड, (Aadhar card) पॅनकार्ड (Pan card) तसेच छायाचित्र ऑनलाइन पद्धतीने मिळवले आणि त्याद्वारे केंद्रीय जीएसटी विभागाकडे नोंदणी केली. त्यानंतर या नोंदणी क्रमांकाच्या आधारे दोन कोटी रुपयांचा व्यापार गुजरातमधून केल्याचे दाखवले. यासाठीचे आर्थिक व्यवहार गुजरातमधील एका स्वतःच्या बँक खात्याद्वारे केले आणि त्यासाठीचा परताव्याची तब्बल पस्तीस लाख रुपयांची रक्कम केंद्रीय जीएसटी विभागाकडून मिळवली. जीएसटीच्या तपासणीमध्ये हा प्रकार उघडकीस आला.
याबाबत केंद्रीय जीएसटी (GST Department) विभागाच्या अधिकाऱ्यांनी जतमध्ये जाऊन चौगुले या व्यक्तीची प्रत्यक्ष भेट घेऊन त्याच्याकडे याबाबत विचारणा केली असता त्याने याची आपल्याला काहीच माहिती नसल्याचे सांगितले. ही व्यक्ती अत्यंत सामान्य आणि शेतमजुरी करणारी आहे. त्यामुळे या प्रकरणाचा अधिक तपास केला असता ही सर्व उलढाल गुजरातमधून झाल्याचे आणि यासाठीचे आर्थिक व्यवहारही गुजरातमधील एका बँकेतून झाल्याचे निष्पन्न झाले. केंद्रीय जीएसटी विभागाने तातडीने याप्रकरणी जत पोलिस ठाण्यात गुजरातमधील संशयित ठकसेनाविरुद्ध गुन्हा दाखल केला आहे. या ठकसेनासोबत आणखी काहीजण या फसवणुकीच्या साखळीमध्ये असण्याची शक्यताही पोलिसांकडून वर्तवली जात आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.