बेळगाव : हाय प्रोफाईल वेश्‍या व्यवसायावर पोलिसांनी अखेर नजर वळविली आहे. मागील दोन दिवसांत पोलिसांनी केलेल्या कारवाईमुळे हाय प्रोफाईल व्यवसाय चालविणाऱ्यांचे धाबे दणाणले आहेत. स्थानिकसह मुंबई आणि पुणे येथून युवतींना आणून बेळगावात हा व्यवसाय सुरू करण्यात आला आहे. आता पोलिसांनी त्याची पाळेमुळे खणण्यास सुरवात केल्याने रॅकेटमधील लोक भूमिगत होऊ लागले आहेत.

बेळगाव जरी शांत दिसत आले, तरी मागील काही वर्षापासून बेळगावातील उच्चभ्रू वसाहती आणि शांत ठिकाणी हाय प्रोफाईलचा व्यवसाय बिनधास्तपणे सुरु आहे. टिळकवाडी, अनगोळ, हनुमाननगर, सदाशिवनगर अशोकनगर, महांतेशनगर अशा शहरातील उपनगरीय भागात हा व्यवसाय फोफावू लागला आहे. स्पा आणि सलूनच्या नावाखाली मसाज सेंटर स्थापून त्याठिकाणी सुरू असलेले हाय प्रोफाईल रॅकट काल (ता. ६) पोलिसांनी उद्‌ध्वस्त केले. त्यापाठोपाठ आज सदाशिवनगर येथे सेक्‍स रॅकेटचा पर्दाफाश केला.

हेही वाचा -  काही वेळाने मुलाने वडिलांचा शोध घेतला ; जुन्या घरातील दृश्य पाहुन मुलाला बसला धक्काच -

दोन दिवसांत दोन ठिकाणी छापे टाकत पोलिसांनी हाय प्रोफाईल व्यवसायावर आपली नजर वळविल्याचे दाखवून दिले आहे. यापूर्वी पोलिसांनी केलेली कारवाई ही बेळगावमध्ये आधीच बदनाम असणाऱ्या लॉजवरील होती, पण आता पोलिसांनी सुरु केलेली कारवाई ही मोठी आहे. बेळगावातील हाय प्रोफाईलच्या ठिकाणी येणाऱ्या युवती पुणे आणि मुंबईतून बोलविल्या जातात. उच्चभ्रू परिसरात अपार्टमेंटमध्ये फ्लॅट घेऊन तेथे व्यवसाय थाटला जातो.

ठराविक कस्टमर आणि त्यांच्या ओळखीवरच हा व्यवसाय होतो. त्यामुळे अशा रॅकेटवर जास्त कोणाची नजरही जात नाही. तीन दिवसाला येथील युवती बदलल्या जातात. पुणे आणि मुंबईहून येणाऱ्या युवती प्रत्येक शहरात फिरत असतात. बेळगावातून पुढे दांडेली, रामनगर ते अगदी गोवा आणि बंगळूरलाही त्या पोचतात. नंतर पुन्हा पुणे, मुंबईकडे परततात. वर्षातून त्यांचा हा प्रवास ठरलेला असतो. त्यामुळे प्रत्येकवेळी बेळगावातील कस्टमरना नवीन युवती म्हणून अशा युवतींची गाठ घालून दिली जात असल्याची चर्चा आहे. 

हेही वाचा - "गोध्रा हत्याकांडामध्ये बाळासाहेब पाठीशी नसते तर आज मोदी, शहा कुठे असते, ते समजू शकले नसते"

"शहरातील सर्व प्रकारचे अवैध धंदे बंद करण्याची सूचना सर्व पोलिस ठाण्यांना करण्यात आली आहे. कोणत्याही प्रकारची हयगय खपवून घेतली जाणार नाही. मसाज पार्लरना सर्व प्रकारची माहिती स्थानिक पोलिस ठाण्यात देण्याचे आदेश बजावले आहेत. यापुढेही याविरोधात कारवाई सुरूच राहील."

- डॉ. विक्रम आमटे, पोलिस उपायुक्त

संपादन - स्नेहल कदम