नगर : राहुरी पोलिस ठाण्याचे निरीक्षक मुकुंद देशमुख यांनी पदाचा गैरवापर करून महात्मा फुले कृषी विद्यापीठाच्या अतिथीगृहात बेकायदा वास्तव्य केले. त्यासाठी कोणतेही शुल्क न भरता, विद्यापीठाची फसवणूक केल्याचा आरोप छत्रपती शिवाजी ब्रिगेडचे संस्थापक अशोक शिंदे यांनी निवेदनाद्वारे पोलिस महासंचालकांकडे केला आहे. 

हेही वाचा जामखेडचे टेन्शन वाढले, काय करायचं ते आता करा 

निवेदनात म्हटले आहे की, महात्मा फुले कृषी विद्यापीठाच्या संशोधकांसाठी व उच्चाधिकाऱ्यांसाठी असलेल्या विशेष श्रेणी अतिथीगृहात राहुरीचे पोलिस निरीक्षक देशमुख गेल्या 280 दिवसांपासून बेकायदा राहत आहेत. शासकीय नियमानुसार चार दिवसांपेक्षा जास्त दिवस अतिथीगृहात राहता येत नाही. विशेष म्हणजे, कोरोनामुळे शासनाने सर्व विश्रामगृहे, अतिथीगृहे बंद करण्याचे आदेश दिलेले आहेत. मात्र, या आदेशाचे उल्लंघन करून निरीक्षक देशमुख अतिथीगृहात राहत आहेत. त्यासाठी देशमुख यांनी विद्यापीठाच्या नोंदवहीत "कार्यालयीन कामकाजासाठी' अशी खोटी नोंद केली आहे. त्या नोंदीच्या आधारे प्रतिदिन 400 रुपये भाडे भरले आहे. 

हेही वाचा पाच स्वस्त धान्य दुकानांना सील 

वास्तविक, देशमुख यांचा विद्यापीठ आस्थापनेशी व कामकाजाशी काही संबंध नाही. त्यांनी प्रतिदिन 800 रुपये भाडे भरणे आवश्‍यक होते. विद्यापीठाच्या दफ्तरी खोटी नोंद करून देशमुख यांनी शासनाची एक लाख 42 हजार 800 रुपयांची फसवणूक केली. दरम्यान, पोलिस महासंचालकांनी पोलिस अधीक्षकांना चौकशीचा आदेश दिला आहे. याबाबत पोलिस निरीक्षक मुकुंद देशमुख यांच्याशी संपर्क केला असता ते म्हणाले की, या प्रकरणाबाबत आपल्याला काहीही माहिती नाही. 

आवश्‍य वाचा एमआयडीसीतील कंपन्यांची चाके फिरण्यास सुरवात 

पोलिस निरीक्षकांनी विद्यापीठाच्या अतिथीगृहात बेकायदा वास्तव्य केल्याची तक्रार विद्यापीठाला प्राप्त झाली आहे. त्या अनुषंगाने दफ्तरतपासणी करीत आहोत. 
- डॉ. दिलीप पवार, प्रभारी कुलसचिव, महात्मा फुले कृषी विद्यापीठ, राहुरी