सांगली - राष्ट्रवादी काँग्रेसचे प्रदेशाध्यक्ष आमदार जयंत पाटील (ता. २२) ईडी कार्यालयात चौकशीसाठी उपस्थित राहणार आहेत. त्यामुळे जिल्ह्यातील राष्ट्रवादीचे प्रमुख कार्यकर्ते मुंबईत आंदोलनात सहभागी होत आहेत. त्यासाठी ते आज रवाना झाले. सांगलीसह इस्लामपूर भागातून मोठ्या प्रमाणात कार्यकर्ते गेले आहेत.

सक्तवसुली संचालनालयाने जयंत पाटील यांना चौकशीसाठी पाचारण केले आहे. ईडीने नोटीस देऊन जयंतरावांची बदनामी चालविली असल्याचा आरोप राष्ट्रवादीने केला आहे. त्याविरोधात आंदोलनाची तयारी केली आहे. सांगलीत पक्षाच्या दुसऱ्या फळीतील कार्यकर्ते राष्ट्रवादीच्या कार्यालयासमोर भाजप सरकारच्या विरोधात आंदोलन करणार आहेत. कार्यकर्त्यांनी शहर-जिल्हा कार्यालयाजवळ जमावे, असे आवाहन शहर-जिल्हाध्यक्ष संजय बजाज यांनी केले.

बजाज यांनी प्रसिद्धिपत्रकात म्हटले आहे, की ईडीची कारवाई सत्ताधाऱ्यांना प्रश्न विचारणाऱ्या विरोधकांवर होत आहे. राष्ट्रवादीकडून अनिल देशमुख, नवाब मलिक यांच्यानंतर जयंत पाटील यांच्यावर कारवाई सुरू आहे. संजय राऊत व अनिल देशमुख प्रकरणात न्यायालयाने ईडीला फटकारले आहे. विद्यमान सरकारच्या २०१४ ते २०२२ या काळात ईडीने १२१ राजकीय नेत्यांविरोधात कारवाई केली. त्यापैकी ९५ टक्के, म्हणजेच ११५ नेत्यांवरील खटले हे विरोधी पक्षांतील नेत्यांच्या संदर्भातील आहेत.

मोदी सरकारच्या काळात कारवाया लक्षणीय वाढल्या असून विरोधकांना टार्गेट करणे हेच उद्दिष्ट आहे. सूडबुद्धीने हे सुरू आहे. नंतर काहींना ‘पावन’ करून पक्षात घेतले गेले आहे. ज्यांना निष्कारण छापेमारी करून सतावण्यात आले, त्यांच्या बदनामीची भरपाई कशी करणार, असा सवाल या आंदोलनातून विचारला जाणार आहे.