चिक्कोडी तालुक्यात विविध ठिकाणी उपचार घेणाऱ्यांची संख्या दोनशेहून अधिक आहे. याशिवाय मुलग्याकडील बाजूचे मिरजेहून अधिक पाहुणे आले होते.
चिक्कोडी : लग्नात (Wedding) जेवण केल्यानंतर सुमारे २०० हून अधिक जणांना विषबाधा झाल्याची घटना मंगळवारी सकाळी उघडकीस आली. हिरेकुडी (ता. चिक्कोडी) येथे ही घटना घडली असून, रुग्णांवर खासगी व सरकारी रुग्णालयात उपचार सुरू आहेत.
चिक्कोडी सरकारी रुग्णालयात ९६ जणांवर उपचार सुरू आहेत. एकसंबा प्राथमिक आरोग्य केंद्रात ४० आणि चिक्कोडी शहरातील विविध रुग्णालयांत काही रुग्णांवर उपचार सुरू आहेत. याबाबत माहिती अशी, हिरेकुडी येथील एका कुटुंबात सोमवारी लग्न होते. यावेळी पाहुणे व गावातील असे सुमारे पाचशे वऱ्हाडींनी जेवणासाठी आले होते.
सर्वजण घरी गेल्यानंतर रात्री उशिरा एकेकांना उलटी, जुलाब सुरू झाले. रात्री जवळपास दवाखान्यात उपचार झाले. सकाळी बरेच रुग्ण चिक्कोडी सरकारी रुग्णालयात उपचारासाठी आले. त्यानंतर रुग्ण संख्या वाढत गेली. रुग्णालय प्रशासनाने याची महिती पोलिसांना दिली. त्यानंतर जेवणातून बाधा झाल्याचा संशय रुग्णांनी व्यक्त केला.
त्यानुसार पोलिसांनी हिरेकुडी गावाला भेट दिली. नातेवाइकांनी चिक्कोडी सरकारी रुग्णालयात धाव घेतली. अनेक रुग्णांना बेळगावला हलविल्याची माहिती मिळत गेल्याने नातेवाईक चिंतेत होते. बाधा झालेल्यांत महिला, लहान मुले व वृद्धांचाही समावेश आहे. मंगळवारी दुपारी चार वाजेपर्यंत कुणालाही जादा त्रास नसल्याचे डॉक्टरांनी सांगितले.
पोलिसांनी हिरेकुडी व चिक्कोडीत माहिती घेतली. आमदार गणेश हुक्केरी, जिल्हा पोलिस अधीक्षक संजीव पाटील, जिल्हा पंचायत मुख्य कार्यकारी अधिकारी हर्षल भोयर, प्रांताधिकारी माधव गित्ते, पोलिस उपअधीक्षक गोपालकृष्ण गौडर, मंडल पोलिस निरीक्षक विश्वनाथ चौगुले यांच्यासह अधिकाऱ्यांनी रुग्णालय व हिरेकुडी येथे भेट देऊन माहिती घेतली.
अन्नातून बाधा झालेले सर्व वयोगटातील रुग्ण आहेत. चिक्कोडी सरकारी रुग्णालयात दाखल झालेले सर्व रुग्णांची तब्येत सुधारत होती. दुपारी चार वाजता एका वृद्धाला अधिक उपचारासाठी बेळगावला पाठविले. या वृद्धाची उलटी व जुलाब थांबला असला तरी रक्तदाब कमी झाल्याने उपचारासाठी पुढे पाठविल्याचे चिक्कोडी सरकारी दवाखान्याचे मुख्य आरोग्यधिकारी डॉ. संतोष कोन्नुरी यांनी सांगितले.
चिक्कोडी तालुक्यात विविध ठिकाणी उपचार घेणाऱ्यांची संख्या दोनशेहून अधिक आहे. याशिवाय मुलग्याकडील बाजूचे मिरजेहून अधिक पाहुणे आले होते. त्यामुळे तेथेही काही पाहुणे अत्यवस्थ झाल्याचे सरकारी दवाखान्यात उपचार घेणारे रुग्ण सांगत होते. याशिवाय एकसंबा प्राथमिक आरोग्य केंद्रातही काही रुग्णांवर उपचार सुरू आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.