बेळगाव : कर्नाटकी प्रशासनाची दडपशाही झटकून काळा दिनाच्या फेरीत हजारो मराठी भाषिक रस्त्यावर उतरले आहेत. त्यामुळे फेरीच्या मार्गावर बंद सदृश्य परिस्थिती निर्माण झाली आहे.

भाषावार प्रांतरचना करताना मराठी भाषिकांवर झालेला अन्याय दूर व्हावा, यासाठी गेल्या अनेक वर्षांपासून लढा देणाऱ्या मराठी भाषिकांतर्फे बुधवारी काळा दिन पाळला जात आहे. काळा दिनाच्या फेरीसाठी महाराष्ट्र एकीकरण समितीतर्फे (Maharashtra Ekikaran Samiti Belgaum) प्रशासनाकडे रितसर परवानगी मागण्यात आली होती.

मात्र, प्रशासनाने शेवटपर्यंत परवानगी देणार नाही अशी भूमिका घेतली, परंतु मराठी भाषिकांनी दडपशाही झुगारून हजारोंच्या संख्येने काळा दिनाच्या फेरीत सहभाग घेतला आहे. त्यामुळे सर्वत्र मराठी भाषिकांची गर्दी दिसून येत असून संयुक्त महाराष्ट्राच्या घोषणांनी परिसर दणाणून सोडण्यात येत आहे.

तसेच बेळगावसह संयुक्त महाराष्ट्र निर्माण होईल, तोपर्यंत लढा सुरू ठेवण्याचा निर्धार फेरीच्या माध्यमातून केला जात आहे. महाराष्ट्र एकीकरण समितीच्या कार्यकर्त्यांसह बालचमू आणि युवावर्ग प्रचंड संख्येने फेरीत सहभागी झाला आहे.