कोल्हापूर : ‘माझे कुटुंब माझी जबाबदारी’ या सर्वेक्षणासाठी बाहेर पडत असतानाच फोन आला. ‘सर घरी यायला पाहिजे. तन्वी पॉझिटिव्ह आलीय’ असा पलीकडून आवाज. मग थेट त्यांचे घर गाठले. घरी बॅग भरून बेड मिळेल तिथे जाण्यासाठी सारी तयारी सुरू होती. सर्वच जण अस्वस्थ. मी बोलायला सुरवात केली. विविध अनुभव सर्वांशी शेअर केले आणि घरीच उपचार करण्याची सर्वांची मानसिक तयारी केली

घरच्यांनीही ते मान्य केले आणि पुढील उपचार सुरू झाले. मुळात सर्वांच्या मनातील कोरोनाबाबतची भीती दूर केली की पुढील साऱ्या गोष्टी सुकर होतात. याचा अनुभव पुन्हा आला....’’ कलाशिक्षक असणारे मिलिंद यादव सांगत होते. 

हेही वाचा- परतीच्या पावसाची हजेरी :  कोल्हापुरात पावसाचा पुन्हा जोर -

श्री. यादव शिवाजी मराठा हायस्कूलमध्ये कलाशिक्षक. शाळा बंद आहेत. मात्र, शासनाने दिलेली विविध कामं रोज सुरू आहेत. त्याच्याही पुढे जाऊन कोरोनाच्या जंजाळातून लोकांना भयमुक्त करण्यासाठी त्यांनी पुढाकार घेतला आहे. फोन येताच ते कुणाच्या घरी तर एखाद्या गल्लीतही जाऊन मोफत समुपदेशन करतात.    
श्री. यादव यांना तन्वीच्याच घरून त्यांना चार दिवसांनी पुन्हा फोन आला. या घरात एकूण नऊ लोक. यावेळीही श्री. यादव यांनी आपल्या खास शैलीत मुलाशी खेळत घरातील साऱ्यांना धीर दिला आणि त्याच्यावरही घरीच उपचार सुरू झाले आणि तोही कोरोनामुक्त झाला.

हेही वाचा- कला अभ्यासक्रमासाठी मुदतवाढ ;विद्यार्थ्यांनो या तारखेपर्यत ऑनलाईन अर्ज करा सादर -

या घरातील सारी मंडळी आता कोरोनाबाबत भयमुक्त झाली आहेत आणि पुन्हा कुणाचाही अहवाल पॉझिटिव्ह आला तर त्याच्याशी घरीच थांबून दोन हात करण्याचा निर्धार त्यांनी पक्का केला आहे. त्यासाठी आवश्‍यक टीप्स श्री. यादव यांनी त्यांना दिल्या आहेत. श्री. यादव यांनी गेली काही दिवस हा उपक्रम मोफत सुरू केला आहे आणि त्यांच्याकडे अशी अनेक उदाहरणे आहेत. ते म्हणतात, ‘‘कोरोनाच्या भीतीपोटी माणूस निम्मा होतो. लोकांत अनेक गैरसमज आहेत. दीड महिना मी अनेकांशी जवळून संवाद साधतो आहे. लोकांना आवाहनही केले. मी कधीही यायला तयार आहे. या आवाहनाला प्रतिसाद मिळतो आहे आणि लोक कोरोनापासून भयमुक्त होत आहेत.’’

संपादन -  अर्चना बनगे