गडहिंग्लज (कोल्हापूर)  : येथील डॉक्‍टर कॉलनीत घराच्या टेरेसवर खेळताना पाईपच्या अँगलला गळ्यातील ओढणी अडकून एका १३ वर्षीय मुलीचा दुर्दैवी मृत्यू झाला. रविना भवराराम चौधरी असे तिचे नाव आहे. 

याबाबतची माहिती अशी

भवराराम चौधरी कुटुंबीय मूळचे चिमणा राम, बाडमेर (राजस्थान) येथील आहे. व्यवसायनिमित्ताने हे कुटुंब अनेक वर्षांपासून गडहिंग्लज येथे वास्तव्यास आहे. डॉक्‍टर कॉलनीत ते भाडेतत्त्वावरील इमारतीत राहतात. आज सायंकाळी नेहमीप्रमाणे रविना व इतर मुली टेरेसवर खेळत होत्या. 

हेही वाचा- मसाई पठारावर नवरंगांचा उत्सव : रानफुलांना आला बहर -

टेरेसवर पाण्याची टाकी आहे. त्याला एल आकाराचे पाईपचे अँगल आहे. सर्व मुली खेळत असताना रविनाच्या गळ्यात असलेली ओढणी त्या अँगलमध्ये अडकली. त्यातच तिला गळफास लागला. सोबतच्या मुलींना काही समजायच्या आतच तिचा जागीच दुर्दैवी मृत्यू झाला. ही घटना समजताच रविनाचे नातेवाईक धावत टेरेसवर पोहचले. तिची अवस्था पाहून नातेवाईकांनी एकच आक्रोश केला. खेळण्याच्या आनंदात असतानाच रविनाला काळाने गाठले. या घटनेने सर्वत्र हळहळ व्यक्त होत आहे. भवराराम चौधरी यांनी पोलिसात फिर्याद दिली आहे. हवालदार प्रशांत गोजारे तपास करीत आहेत. रविना सातवीत शिकत होती.

संपादन - अर्चना बनगे