बेळगाव : प्रसूती वेदना सुरू असतानाही रुग्णालयात गर्भवतीला दाखल करून घेण्यास टाळाटाळ झाल्याचा प्रकार गुरुवारी रात्री घडला. खासगी रुग्णालयात बाळंतपणानंतर महिलेची स्थिती गंभीर बनल्याने तिला अतिदक्षता विभागात दाखल केले आहे. गर्भवतीला झालेल्या त्रासाबाबत तिच्या कुटुंबीयांनी पोलिस स्थानकात धाव घेतली. यामुळे कोरोना काळात सर्व रुग्णांवर व्यवस्थित उपचार होत असल्याच्या जिल्हा प्रशासनाच्या दाव्याला खीळ बसली आहे.

बाळेकुंद्री खुर्द परिसरातील गर्भवती बैलहोंगल येथे माहेरी गेली होती. कोरोनाबाधित आढळल्यानंतर तेथील कोरोना उपचार केंद्रात दाखल केले. प्रशासनाकडून सकस आहार आणि गरम पाणी दिले जात असल्याचे सांगितले जात आहे, पण कोणतीच सुविधा गर्भवतीला कोरोना केंद्रात दिली नाही. आठ दिवसांनंतर तिला घरी सोडले. तेथेे व्यवस्थित उपचार होणार नसल्याने महिलेला बाळेकुंद्री खुर्द येथे सासरी आणले. महिलेचा पतीही कोरोनाबाधित झाल्याने सर्वांना घरातच क्वारंटाईन केले. प्रसूतीचा काळ जवळ आल्याने तिला मुतगा प्राथमिक आरोग्य केंद्रात दाखल केले.

हेही वाचा - वाद्यांच्या गजरात वाजत्रींनी वेधले लक्ष का वाचा...?

येथे वैद्याधिकाऱ्यांनी तपासणी करुन प्रसूती प्राथमिक आरोग्य केंद्रातच करण्यास सांगितले. मात्र, गुरुवारी रात्री वैद्याधिकारी नसताना बाळेकुंद्री खुर्द येथील आशा कार्यकर्त्यांनी संबंधित महिला कोरोनाबाधित असल्याची माहिती तेथील परिचारिकेला दिली. त्यामुळे परिचारिकेने तिच्याकडे दुर्लक्ष केले. महिलेला प्रसूती कळा सुरु झाल्यानंतरही दखल घेतली नाही. महिलेचा पती कोरोनाबाधित असतानाही प्राथमिक आरोग्य केंद्रात बोलावून घेतले. पतीसमवेत गर्भवतीला रात्री खासगी रुग्णालयाचे रेफरन्स पत्र देऊन बाहेर काढले.

महिनाभरापासून कोरोनाचा संसर्ग झाल्यानंतरच्या उपेक्षेमुळे गर्भवतीचा रक्तदाबही वाढला. रेफरन्स पत्र असलेल्या खासगी रुग्णालयातही तिला कोरोना निगेटिव्ह असल्याचा अहवाल नसल्याचे कारण देत दाखल करुन घेण्यास टाळाटाळ झाली. अखेर तिला वडगावातील खासगी रुग्णालयात दाखल केले असून प्रसूतीनंतर रक्तदाब वाढल्याने अतिदक्षता विभागात दाखल केले. हे प्रकरण मारिहाळ पोलिस स्थानकापर्यंत पोचले असून संबंधित आशा कार्यकर्ता आणि परिचारिकेवर गुन्हा दाखल करण्याची लेखी मागणी महिलेच्या कुटुंबीयांनी केली आहे. मात्र, पोलिसांनी गुन्हा दाखल केलेला नाही.

हेही वाचा - कळतय पण वळत नाही : बेडसाठी दिवसभर; इंजेक्‍शनसाठी रात्रभर अन् मास्क मात्र हनुवटीवरच

"प्रसूती कळा सुरू झाल्यानेच गर्भवतीला रेफरन्स लेटर देऊन दुसऱ्या रुग्णालयात पाठविले. मात्र, नामसाधर्म्यामुळे ते वेगळ्याच रुग्णालयात गेले. तेथून त्यांना रेफरन्स असलेल्या रुग्णालयात जाणे आवश्‍यक होते, पण ते खासगी रुग्णालयात दाखल झाले. आतापर्यंत सर्व गर्भवतींवर यशस्वी उपचार केले आहेत. या प्रकरणाची अधिक चौकशी करत आहे." 

- डॉ. शशिकांत मुन्याळ, जिल्हा आरोग्याधिकारी

संपादन - स्नेहल कदम