कोल्हापूर : विधानसभा निवडणुकीच्या निमित्ताने गेल्या चार वर्षांपासून एकमेकांसमोर ठाकलेले आणि त्यातून आरोप-प्रत्यारोपांच्या फैरी झाडणारे कागलचे नेते मंत्री हसन मुश्रीफ (Hasan Mushrif) व भाजपचे माजी जिल्हाध्यक्ष समरजितसिंह घाटगे (Samarjitsingh Ghatge) पाणी प्रश्‍नावर मात्र एकत्र आल्याचे आज पाहायला मिळाले.

सुळकुडवरून इचलकरंजीला पाणी द्यायचे नाही, या एका प्रश्‍नावर तरी या दोन नेत्यांचे एकमत झाल्याचे आज दिसले. पक्षापेक्षा गटातटाच्या राजकारणाला महत्त्व असलेल्या कागल तालुक्यात विधानसभेवरून (Kagal Assembly Election) मुश्रीफ-समरजित असा सामना चांगलाच रंगला आहे.

२०१९ च्या निवडणुकीत कागलची जागा युतीत शिवसेनेला गेल्यानंतर अपक्ष म्हणून रिंगणात उतरलेल्या समरजित यांनी श्री. मुश्रीफ यांच्यासमोर चांगलेच आव्हान उभे केले होते, पण त्यात त्यांना यश मिळाले नाही. त्यानंतर खचून न जाता पुन्हा गेल्या चार वर्षांपासून समरजित नेटाने किल्ला लढवत आहेत. त्यातून त्यांनी मुश्रीफ यांना संधी मिळेल तिथे आव्हान देण्याचा प्रयत्न केला.

राजकारणात मुरलेल्या मुश्रीफ यांनीही त्यांना त्याच ताकदीने प्रत्युत्तर दिले आहे. याच महिन्यात राज्यात राजकीय उलथापालथ झाली आणि अनपेक्षितपणे मुश्रीफ हे भाजप सरकारमध्ये मंत्री झाले. यामुळे नाराज झालेल्या समरजित यांची चांगलीच कोंडी झाली. तथापि उपमुख्यमंत्री देवेंद्र फडणवीस यांनी केलेल्या मनधरणीनंतर समरजित पुन्हा सक्रिय झाले आहेत.

कागल तालुक्यातील सुळकुड येथून इचलकरंजीला पाणी देण्याचा मुद्दा गेल्या काही दिवसांपासून चांगलाच गाजत आहे. आतापर्यंत या योजनेबाबत थेट भूमिका मुश्रीफ यांनी घेतली नव्हती, समरजित हेदेखील यापासून सावध भूमिकेत होते.

आज मुश्रीफ यांच्या पुढाकाराने या योजनेला विरोध करण्यासाठी झालेल्या बैठकीला हे दोन नेते एकत्र आले. केवळ एकत्र आले नाहीत तर या प्रश्‍नावर त्यांचे एकमतही झाले. विधानसभेत काय होईल माहिती नाही पण पाणी प्रश्‍नाने तरी या दोन नेत्यांची मने जुळली, असे म्हटले तरी ते वावगे ठरणार नाही. राजकीय मतभेद राहतील पण पाण्याने मात्र या दोन नेत्यांना एकाच व्यासपीठावर येण्यास भाग पाडले.