कोल्हापूर - खासदार संभाजीराजे यांना दुखावण्याचा अथवा राजकारण करण्याचा कोणताही हेतू नसल्याचे स्पष्टीकरण महापौर निलोफर आजरेकर यांनी दिले आहे. मराठा आरक्षणास सर्वोच्च न्यायालयाने स्थगिती दिल्याने कालची सर्वसाधारण सभा तहकूब झाली. शासनाला जबाबदार धरून तसेच केंद्र सरकारचा निषेध करून आरक्षण आंदोलनाला पाठिंबा दिला. 

खासदार संभाजीराजे छत्रपती यांना पंतप्रधान नरेंद्र मोदी यांनी भेट नाकारल्याच्या निषेधार्थ शुक्रवारी कोल्हापूर महानगरपालिकेची सभा तहकुब करण्यात आली होती. त्यामुळे याबाबत संभाजीराजे छत्रपती यांनी एक पत्र पसिद्ध करून महापालिकेच्या भूमिकेवर नाराजी व्यक्त केली होती. त्यामुळे आज महापौर आजरेकर यांनी आपली भूमिका मांडत संभाजी राजे यांना दुखावण्याचा अथवा राजकारण करण्याचा हेतू नसल्याचे स्पष्ट केले. 

केंद्र सरकारकडून मराठा आरक्षणासंबंधी सहकार्य मिळणे अपेक्षित होते त्याप्रमाणे ते मिळाले नाही. कोल्हापूरचे छत्रपती घराणे हे कोणताही पक्ष जात धर्म, पाहून काम करत नाही. ते केवळ समाजासाठी काम करतात. याची आम्हास कल्पना आहे. यासंबंधी संभाजीराजे छत्रपती व सर्व खासदार यांना पंतप्रधान नरेंद्र मोदी यांनी भेट न दिल्याची बातमी वाचली. त्यामुळे कोल्हापूरवासीयांची अस्मिता दुखावली गेली. त्यातूनच भावना व्यक्त झाली. छत्रपती घराणे शाहूप्रेमी व कोल्हापूरवासीयांचा आदर, श्रद्धा व अस्मितेची बाब आहे. यात संभाजीराजेंना कोणत्याही प्रकारे दुखावण्याचा अथवा राजकारण करण्याचा हेतू नव्हता. देशात आरक्षणाचा पहिला निर्णय तसेच कायदा करणाऱ्या राजर्षी छत्रपती शाहू महाराज हे आमचे आदरस्थान असल्याचे आजरेकर म्हणाल्या.

हे पण वाचा - मी ठरवले तर पंतप्रधान नरेंद्र मोदींना कधीही भेटू शकतो, पण... ; खासदार संभाजीराजे

कोल्हापूरच्या छत्रपती घराण्याचा आदर आहे. संभाजीराजे यांनी मोठ्या प्रयत्नातून शहरासाठी केंद्र सरकारकडून गॅस पाईपलाईनची योजना मंजूर केली. त्याचा आम्हालाही अभिमान आहे. कोरोनाच्या पार्श्‍वभूमीवर सभागृहात चर्चा करणे आवश्‍यक आहे. पाईपलाईन योजना ज्या भागातून जाणार आहे तेथील नगरसेवकांशी बैठक घेऊन चर्चा करणार आहोत, अशी माहिती आजरेकर यांनी दिली. 

हे पण वाचा - व्हिजन ऍग्रोचा संचालक सुशील पाटील जेरबंद ; घराच्या पोटमाळ्यावर बसला होता लपून

संपादन - धनाजी सुर्वे