आजरा : किणे (ता. आजरा) येथे घराची भिंत कोसळून सुनीता अर्जुन गुडूळकर (वय ४५) ठार झाल्या. त्यांचे पती अर्जुन नरसु गुडूळकर (५५) व वत्सला परसु गुडूळकर (५२ ) जखमी झाले आहेत. काल सकाळी सातला ही घटना घडली.

आजरा तालुक्यात (Ajara) पावसाने हा बळी घेतला आहे. येथील प्राथमिक शाळेसमोर अर्जुन गुडूळकर यांचे घर आहे. मागील बाजूला रामा परसु गुडूळकर व वत्सला परसु गुडूळकर यांचे मातीचे घर आहे. मुसळधार पावसात गुडूळकर यांची भिंत भिजली होती. सकाळी वीस फूट उंचीची भिंत अर्जुन गुडूळकर यांच्या घरावर कोसळली.

दरम्यान सुनीता गोठ्याकडे जात होत्या. अर्जुन बाजूला असलेल्या न्हाणीत तोंड धूत होते. अचानक पलीकडच्या घराची भिंत त्यांच्या घरावर कोसळल्यामुळे सुनीता ढिगाऱ्याखाली सापडल्या. अर्जुनदेखील अडकले. आवाजाने नणंद वत्सला बाहेर आल्या.

त्या वेळी विजेचा प्रवाह ओल्या भिंतीत उतरला होता. त्यांना विजेचा धक्का बसल्याने त्या जागीच बेशुद्ध पडल्या. शेजारी व ग्रामस्थांनी घटनास्थळी धाव घेतली. त्यांनी वीज प्रवाह बंद करून दोघांना ढिगाऱ्यातून बाहेर काढले. जखमींना नेसरी ग्रामीण रुग्णालायत हलवण्यात आले.

उपचारापूर्वीच सुनीता यांचा मृत्यू झाला. अर्जुन व वत्सला यांना उपचारानंतर संध्याकाळी घरी पाठवण्यात आले. तहसीलदार समीर माने, नायब तहसीलदार म्हाळसाकांत देसाई, प्रांत वसुंधरा बारवे यांनी घटनास्थळी भेट दिली. पालकमंत्री दीपक केसरकर यांचे स्वीय सचिव अमित कामत यांनी भेट देऊन गुडूळकर कुटुंबीयांचे सांत्वन केले.

रोशनची हरवली सावली

सुनीता यांचा मुलगा रोशन मतिमंद आहे. त्यांची मुलगी अश्विनी यांचा विवाह झाला आहे. रोशनच्या भविष्याची चिंता त्यांना सतावत होती. गेली २३ वर्षे रोशनचा त्यांनी लाडाने सांभाळ केला होता. कुठेही जाताना त्या रोशनला सोबत घेऊन जात होत्या. त्याची सावलीसारखी सोबत करत होत्या. ही सावलीच हरवल्याने रोशन अनाथ झाला आहे.

भावाच्या रक्षाविसर्जनाला पत्नीचा मृत्यू

अर्जुन यांचे चुलत भाऊ नारायण गुडूळकर यांचे निधन झाले असून, आज रक्षाविसर्जन होते. अर्जुन मुंबई येथे काम करतात. ते बुधवारी सकाळी किणे येथे आले होते. भावाच्या रक्षाविसर्जनादिवशीच पत्नीचा मृत्यू झाल्याने पत्नीचे अंत्यसंस्कार करण्याचे दुर्दैवी वेळ त्यांच्यावर आली. या घटनेमुळे ग्रामस्थ व किणे पंचक्रोशीत हळहळ व्यक्त होत आहे.