कोल्हापूर : कर्नाटक सरकार अलमट्टीची उंची वाढवत आहे. अलमट्टीची उंची वाढवू नये आणि मनगुत्तीमध्ये छत्रपती शिवाजी महाराज यांचा पुतळा बसविण्यासाठी चंद्रकांत पाटील यांनी आंदोलन करावे. त्यांच्या नेतृत्वाखाली मी स्वत: आंदोलन करण्यास तयार असल्याचे ग्रामविकासमंत्री हसन मुश्रीफ यांनी आमदार चंद्रकांत पाटील यांना आव्हान दिले. तर, उद्या कोल्हापूरमध्ये येत असलेल्या विरोधी पक्षनेते देवेंद्र फडणवीस यांनी अलमट्टीची उंची वाढविण्याला विरोध करावा. तसेच, मनगुत्ती येथे छत्रपती शिवाजी महाराज यांचा पुतळा उभारण्यासाठी कनार्टकच्या मुख्यमंत्र्यांना आवाहन करावे, अशी मागणी श्री मुश्रीफ यांनी केली. 

मुश्रीफ म्हणाले, भाजपने देऊळ उघडण्यासाठी घंटानाद करण्याऐवजी कर्नाटकचे मुख्यमंत्री अलमट्टी धरणची उंची वाढवत आहेत, त्याविरोधात आंदोलन करावे. मी स्वत: आमदार चंद्रकांत पाटील यांच्या नेतृत्वाखाली बेंगलोर येथे कर्नाटकच्या मुख्यमंत्र्यांच्या बंगल्यासमोर आंदोलन करायलाय तयार असल्याचेही श्री मुश्रीफ यांनी सांगितले.

हे पण वाचा - भाजप-एमआयएम एकत्रच ;  मुश्रीफांचा आरोप

ते म्हणाले, उद्या माजी मुख्यमंत्री आणि विरोधी पक्ष नेते देवेंद्र फडणवीस कोल्हापूरमध्ये येत आहे. त्यांनी दोन कामे करावीत, अलमट्टीची उंची वाढविण्याला विरोध करावा आणि दुसरे म्हणजे मनगुत्तीमध्ये छत्रपती शिवाजी महाराज यांचा पुतळा बसविण्यासाठी कर्नाटकच्या मुख्यमंत्र्यांना विनंती करावी, असे आवाहनी श्री मुश्रीफ यांनी यावेळी केले.

हे पण वाचा -  कोरोनासोबत जगणारे देशातील पहिलेच राज्य

संपादन - धनाजी सुर्वे