कोल्हापूर : मराठा आरक्षणासाठी (maratha reservation) केंद्र सरकारने (central government) ठरवले तर घटनादुरुस्ती होऊ शकते, असा विश्वास व्यक्त करत आरक्षणासाठी कायदेशीर लढाई सुरू ठेवावी लागेल, असे खासदार प्रा. संजय मंडलिक (sanjay mandlik) यांनी आज येथे सांगितले. छत्रपती शाहू महाराज संशोधन प्रशिक्षण व मानव विकास संस्थेसाठी (सारथी) आवश्यक निर्णय घेत शासनाने मराठा समाजासाठी पुढचे पाऊल टाकले असून, ते मराठा आरक्षणासाठी सकारात्मक असल्याचेही त्यांनी स्पष्ट केले. सकल मराठा समाजातर्फे मराठा आरक्षण विषयावर आयोजित बैठकीत ते बोलत होते. शासकीय विश्रामगृह येथे बैठक झाली.

यावेळी मंडलिक म्हणाले, ‘‘मराठा समाजाने ५८ मोर्चे काढले. त्याचा आक्रोश शासनापर्यंत पोचला. सर्वोच्च न्यायालयाने मराठा समाजाचे आरक्षण रद्दबातल ठरविल्यानंतर पुन्हा कोल्हापुरात नुकतेच मूक आंदोलन झाले. त्याच दिवशी शासन नेमकेपणाने काय करणार या बद्दल मी बोललो होतो. खासदार युवराज संभाजीराजे छत्रपती (sambhajiraje) यांच्या नेतृत्वाखाली शासनासमवेत झालेल्या बैठकीलाही मी हजर होतो. तेथे सारथी व अण्णासाहेब पाटील आर्थिक विकास महामंडळासाठी आवश्यक त्या मागण्या शासनाने मान्य केल्या आहेत.’’

संभाजीराजे यांच्या नेतृत्वाखाली खासदारांनी मराठा आरक्षणासाठी पंतप्रधानांना पत्र दिल्याचेही त्यांनी सांगितले. जयंत पाटील म्हणाले, ‘‘संभाजीराजे यांनी शासनाला अल्टिमेटम दिला आहे. त्यामुळे २१ दिवस आम्ही आंदोलन करणार नाही.’’

बाबा इंदूलकर म्हणाले, ‘‘आरक्षण कसे मिळवून देणार यावर कोणीच बोलत नाही. आरक्षणासाठी आऊटकम कधी येणार हे माहीत नाही. परिणामी कोर्टाची लढाई सुरू ठेवून राज्य शासनाने आवश्यक ते निर्णय घ्यावेत.’’ प्रा. मंडलिक यांना आरक्षणासंदर्भातील पत्र देण्यात आले. महेश जाधव, सुजित चव्हाण, निवास साळोखे, बाबा पार्टे, अजित राऊत, महादेव पाटील, जयकुमार शिंदे, स्वप्नील पार्टे, अशोक भंडारे उपस्थित होते.