कोल्हापूर-मुंबई विमानसेवा ५ एप्रिलपासून

स्टार एअरवेजची सुविधा ः मंगळवार, बुधवार, गुरुवार व शनिवारी सेवा

सकाळ वृत्तसेवा
कोल्हापूर, ता. २५ ः आंतरराष्ट्रीय पातळीवर पोहोचण्याचा टप्पा पूर्ण करत असलेल्या कोल्हापूर विमानतळावरून आता आठवड्यातील चार दिवस कोल्हापूर-मुंबई विमानसेवा सुरू होत आहे. स्टार एअरवेजच्या माध्यमातून या सेवेची सुरुवात ५ एप्रिलपासून होत आहे. दर मंगळवार, बुधवार, गुरुवार व शनिवारी ही सुविधा सुरू राहील.
अलीकडेच विमानतळाच्या धावपट्टी विस्तारीकरण, नाईट लँडिंग, टॅक्सी पार्किंग आदी सुविधा कोल्हापूर विमानतळावर सुरू झाल्या आहेत. सध्या कोल्हापूर विमानतळावरून अहमदाबादमार्गे दिल्ली, बंगळूर, हैदराबाद, तिरुपती आदी विमानसेवा सुरू आहेत. कोल्हापूर-मुंबई विमानसेवा आठवड्यातून दोनच वेळा सुरू होती, पण या विमानांच्या वेळा सोयीस्कर नव्हत्या. यावर मार्ग काढण्यासाठी स्टार एअरची नवी विमानसेवा कोल्हापूर-मुंबई मार्गावर सुरू होत आहे.
कोल्हापूर-मुंबई मार्गावर ५ एप्रिलपासून सेवा सुरू होत आहे. मुंबईहून सकाळी साडेदहा वाजता विमानाचे टेकऑप होऊन सकाळी साडेआकरा वाजता ते कोल्हापुरात पोहोचेल. कोल्हापुरातून मुंबईसाठी ११.५५ वाजता विमानाचे उड्डाण होईल आणि ते १२ वाजून ५५ मिनिटांनी पोहोचेल.
.........