हातकणंगले : सुमारे दीड हजारहून अधिक सापांना (Snake) जीवनदान देणाऱ्या सर्पमित्राच्या पत्नीचा सर्पदंशाने मृत्यू झाल्याची हृदयद्रावक घटना काल मध्यरात्री आळते (ता. हातकणंगले) येथे घडली. अनिता प्रमोद जनगोंडा (वय ३५) असे सर्पदंशाने मृत्यू झालेल्या विवाहितेचे नाव आहे.

या घटनेची नोंद हातकणंगले पोलिसांत (Hatkanangale Police) झाली आहे. याबाबत अधिक माहिती अशी, आळते येथील अनिता व प्रमोद जनगोंडा यांनी काही वर्षांपूर्वी प्रेमविवाह (Love Marriage) केला आहे. प्रमोद एका उद्योग समूहामध्ये नोकरीस आहेत. परिसरात 'सर्पमित्र' म्हणून प्रमोदची ख्याती आहे.

त्याने आजवर दीड हजारांहून अधिक सापांना जीवनदान दिले आहे. दोनच दिवसांपूर्वी त्याचा सर्पदंशापासून बचाव कसा करायचा याबाबतचा व्हिडिओ व्हायरल झाला आहे. शिवाय त्याने अनेकांना साप पकडण्याचे ट्रेनिंगही दिले आहे.

काल रात्री बाराच्या सुमारास दोघेही घरात झोपले होते. एक ते दीडच्या दरम्यान प्रमोद यांना जाग आली असता लाईट लावल्यानंतर त्यांना अस्सल नाग अनिता यांच्या पायाशेजारी फणा काढून बसला असल्याचे दिसले. जवळ जाऊन पाहिले असता नागाने अनिता यांच्या एका पायावर दंश केल्याचे दिसून आले.

प्रमोद नागाला पकडण्याच्या प्रयत्नात असतानाच अनिता यांचा पाय लागल्याने नागाने दुसरा दंश केला, तरीही नागाला पकडून त्यांनी कुटुंबांसह अनिता यांना वैद्यकीय उपचारासाठी सांगली येथील शासकीय रुग्णालयात नेले; मात्र वैद्यकीय अधिकाऱ्यांनी त्या उपचारांपूर्वीच मृत झाल्याचे घोषित केले. या घटनेने आळते परिसरात हळहळ व्यक्त होत आहे. अनिता यांच्या मागे पती, मुलगा, परिवार आहे.