सांगली ः मिरजेतील शेतकरी संघटनेचे पदाधिकारी राजेश मनोहर म्हेत्रे (वय 38, रा. वखारभाग, मिरज) यांनी कर्जास कंटाळून विषारी द्रव्य प्राशन करून आत्महत्या केली. म्हेत्रे यांनी दोन दिवसांपूर्वी विषारी द्रव्य प्राशन केले होते. गंभीर अवस्थेत त्यांना रुग्णालयात दाखल करण्यात आले होते. उपचारा दरम्यान त्यांचा काल मृत्यू झाला. याबाबत मिरज शहर पोलिस ठाण्यात नोंद आहे. 

म्हेत्रे यांनी दोन दिवसांपूर्वी पत्नीला व्हॉटस्‌अप मेसेज पाठवला होता. त्यामध्ये त्यांनी शेती पिकली नाही. मुलांचा शिक्षणाचा खर्च पेलत नसल्याने मी सोडून जात आहे, अशा मेसेज पाठवून विषारी द्रव्य प्रशान केले आहे. म्हेत्रे यांना दोन लहान मुले आहेत. त्यांनी दोन बॅंका व नातेवाईकांकडून पाच लाखांचे कर्ज घेतले होते. 

एक एकर द्राक्ष बाग वाया गेल्याने ते निराश झाले होते. बॅंकेकडून पीक कर्जाची दोन लाखांची कर्जमाफी मिळाली नव्हती. वसुलीसाठी तगादा लागल्याने नैराश्‍यातून त्यांनी विषारी द्रव्य प्राशन केल्याची माहिती मिळाली. 

म्हेत्रे हे शेतकरी संघटनेचे पदाधिकारी म्हणून काम करत होते. शेतकऱ्यांसाठी विविध आंदोलनात त्यांचा सहभाग होता. त्यांच्या दुर्दैवी मृत्यूने हळहळ व्यक्त होत आहे.