मिरज: शारीरिक स्वास्थ्य वाढविण्यासाठी आणि आरोग्य उत्तम टिकविण्यासाठी व्यायाम महत्त्वाचा आहे. मात्र, गेली दोन वर्षे कोरोना संसर्गामुळे अनेकांचे आरोग्याकडे दुर्लक्ष झाले. शासनाच्या निर्बंधांमुळे जिम बंद होत्या. आता मात्र शासनाने सर्व निर्बंध शिथिल केले असून, जिम पुन्हा पूर्ण क्षमतेने सुरू झाल्या आहेत. १८ ते २५ आणि २६ ते ४० वयोगटातील तरुणाईची पाऊले पुन्हा जिमकडे वळली आहेत.

शहरातील अनेक जिम सकाळ सत्रात हाउसफुल्ल दिसत आहेत. काहींना सकाळी संधी मिळत नसल्याने त्यांनी सायंकाळी जीम जॉईन केली आहे. आजच्या आधुनिक युगात व्यायामाविषयीचे नववने तंत्रज्ञान तसेच गॅझेट बाजारात उपलब्ध आहेत, त्याचाही वापर तरुणाई करताना दिसत आहे. स्मार्ट फोनवरून माहिती घेत ॲप्सच्या मदतीनेही व्यायाम केला जात आहे. प्रत्येकाला पर्सनल ट्रेनर ठेवणे जमत नसल्याने तरुणाईकडून यू-टूबचा वापर सुरू आहे.

सध्या जिममध्ये छातीचे व्यायामाचे प्रकार, पायांचे व्यायाम प्रकार, पोटावरील चरबी कमी करण्याच्या टिप्स, नॅचरल रनिंग रॉम्प आदी साधनांचा वापर करून शरीरसृष्टी भक्कम केली जात आहे. सध्या ५०० रुपयांपासून दोन-तीन हजार रुपयांपर्यंत नवे तंत्रज्ञान असलेल्या जिम्सचे दर आहेत.

सध्याची तरुणाई शरीरसौष्ठव स्पर्धेसाठी आग्रही आहे. यामुळे जिममध्ये कष्ट करण्याची तयारी तरुणाई करते आहे. शिवाय, शासकीय नोकरीतील आरक्षित क्रीडा प्रकारात ही स्पर्धा येत असल्याने नोकरीसाठी या स्पर्धेच्या प्रमाणपत्राचा नक्की उपयोग होतो.

- समीर जमादार, शरीरसौष्ठव स्पर्धक