बेळगाव : जिल्हा रुग्णालयातील प्रसुतीगृहाचा गलथान कारभार दिवसेंदिवस वाढतच चालला आहे. अस्वच्छतेमुळे गर्भवती, माता आणि बालकांच्या आरोग्याचा प्रश्‍न ऐरणीवर आला आहे. त्यातच आता स्वच्छतागृहांच्या दुरुस्तीचे काम हाती घेण्यात आले असून तेथील मातीचे ढिगारे वार्डातच टाकण्यात आले आहेत. त्याचा वॉर्डातील माता व बालकांच्या आरोग्यास धोका निर्माण झाला आहे. 

हे पण वाचा - व्हॉट्‌सॲपवरील त्या मेसेजमुळे मोडले तिचे लग्न...

गेल्या दोन आठवड्यापासून हा प्रकार सुरु असून बांधकामाच्या साहित्याची तेथूनच ने-आण करण्यात येत आहे. त्यामुळे आरोग्याच्या दृष्टीकोनातून दुरुस्तीकाम पूर्ण होईपर्यंत तेथील माता आणि बालकांना अन्य वार्डात हलविण्यात यावे, अशी मागणी करण्यात येत आहे. जिल्हा रुग्णालयातील स्वच्छतेवरुन बिम्स प्रशासनाला आमदार अनिल बेनके आणि मुख्यमंत्र्याचे राजकीय सचिव शंकरगौडा पाटील यांनी अनेकवेळा खडसावले आहे; पण तेथील परिस्थिती अद्यापही सुधारलेली नाही. प्रसुतीगृहातील स्वच्छतागृहांची स्थिती अत्यंत बिकट बनली आहे. स्वच्छतागृहासह पिण्यासाठी पाण्याचा तुटवडा भासत असल्याने रुग्णांच्या नातेवाईकांना बाहेरुन पाणी आणण्याची वेळ येत आहे. प्रसुतीगृहाच्या पहिल्या मजल्यावरील एका वार्डच्या स्वच्छतागृहाचे दुरुस्तीकाम हाती घेण्यात आले आहे. खोदकाम करण्यात आलेले जुने साहित्य वार्डातच टाकण्यात आले आहे. त्यामुळे कमालीची दुर्गंधी पसरली आहे. 

हे पण वाचा - कोल्हापूरात दोन वर्षांत पाच तरुणी झाल्या बेपत्ता...

दरम्यान, या ठिकाणाहून बाळंतीण, नातेवाईक, परिचारिका आणि डॉक्‍टर ये-जा करीत आहेत. त्यामुळे मातांच्या खाटाजवळ दुर्गंधी पसरत आहे. नवीन बांधकामासाठी लागणारे साहित्यही तेथूनच ने-आण करण्यात येत आहे. फरशी बसविण्यासाठी मशीनचा वापर करण्यात येत असल्याने आवाज आणि धुळीचा सामना करावा लागत आहे. एकंदरीत रुग्णांच्या जिवाशी हा खेळ चालला असल्याचा आरोप रुग्णांच्या नातेवाईकांतून करण्यात येत आहे. त्यामुळे तेथील गर्भवती, बाळतिणींसह बालकांना अन्य वार्डात हलविण्यात यावे, अशी मागणी करण्यात येत आहे. 

"प्रसुतीगृहातील स्वच्छतागृहांच्या दुरुस्तीचे काम सुरु असल्याबाबतची आपल्याला कल्पना नाही. याची लवकरच माहिती घेण्यात येईल, असा प्रकार असल्यास तेथील रुग्णांना अन्य ठिकाणी स्थलांतरीत करण्यात येईल.'' 
-डॉ. विनय दास्तीकोप, वैद्यकीय संचालक, बिम्स