मंगळवेढा (सोलापूर) : तालुक्यातील खडकी येथे एका काळवीटाची शिकार करून त्यांचे मांस शिजवल्या प्रकरणी वनविभागाने ताब्यात घेतलेल्या अजय पपल्या शिंदे (वय 29) व सतिश पपल्या शिंदे (वय 25, दोघे रा.खडकी) या दोघांना न्यायालयात न्यायाधीश आर.व्ही.नडगदल्ली यांनी तीन दिवसांची पोलिस कोठडी सुनावली आहे

तालुक्यातील ही पहिलीची घटना असल्याने खळबळ उडाली. त्यांच्यावर वन्य जीव संरक्षण कायदा अंतर्गत गुन्हे दाखल करण्यात आले. या घटनेची हकीकत अशी की खडकी येथील तांड्यावर रात्री नऊच्या दरम्यान एका काळवीटाची शिकार करून त्याचे मांस शिजवून खात असल्‍याची गोपनीय माहिती वनपरिक्षेत्रचे अधिकारी विलास पवळे यांना समजल्यावर पो.कॉ.सागर लांडे, राजू आवटे, महिला पोलिस रूपाली रेडेकर, वनपाल सुभाष बुरूंगले, वनरक्षक गोरख माळी, श्रीशैल्य पाटील, भागवत मासाळ, सोमनाथ होनमाने, शंकर रूपनर, दशरथ बुरूंगले, मधुकर बनसोडे, आण्णा अवघडे, रमेश माने, दर्‍याप्पा न्यामगोंडे आदींनी छापा टाकून वरील दोघांना ताब्यात घेतले.

यावेळी शिजवलेले काळविटाचे मांस तसेच काळवीटाची दोन शिंगे व कातडे पूर्वी शिकार केलेले काळविटाचे जुने कातडेही वनविभागातील अधिकाय्रानी जप्त केले.न्यायालयात वनविभागाच्या अधिकाऱ्यांनी या काळवीटाची तस्करी झाली आहे का? शिवाय या प्रकरणात आणखी कोण सहभागी आहे का या तपासासाठी सात दिवसाची पोलीस कोठडीतून द्यावी अशी मागणी केली. परंतु आरोपी हे येथील नागरिक असून अशा प्रकारची तस्करी यापूर्वी झाली नाही.मयत झालेले काळवीट पाहण्यासाठी गेल्यावर त्याच्यावर खोटा गुन्हा दाखल करण्यात आल्याचा युक्तीवाद अॅड धनंजय हजारे यांनी मांडला सरकारपक्षाकडून अॅड बनसोडे यांनी बाजू मांडली.दोन्ही बाजूच्या युक्तीवाद ऐकून न्यायाधीस आर.व्ही.नडगदल्ली ही कोठडी सुनावली.