सोलापूर - प्रधानमंत्री सन्मान निधीतील शेतकऱ्यांच्या माहितीचे ३१ मार्चनंतर गावोगावी चावडीवाचन होणार आहे. 

राज्यातील दीड लाख अल्प व अत्यल्प भूधारकांपैकी सन्मान निधीसाठी ३७ लाख खातेदार अपात्र ठरतील. आतापर्यंत ५९ लाख ९३ हजार लाभार्थींची माहिती अपलोड केली असून, आचारसंहितेपूर्वी सरसकट शेतकऱ्यांच्या खात्यात दोन हजारांचा पहिला हप्ता जमा करण्याच्या सूचना केंद्र स्तरावरून देण्यात आल्याचे कृषी विभागाकडून सांगण्यात आले.

महाराष्ट्रातील सव्वा कोटी खातेदारांसह देशातील १२ कोटी ५० लाख शेतकऱ्यांना सन्मान योजनेंतर्गत प्रत्येकी सहा हजार रुपये मिळणार आहेत. दरम्यान, या योजनेचा पुढील हप्ता जमा करण्याकरिता आचारसंहितेचा अडथळा ठरू शकतो का, याबाबत निवडणूक आयोगाकडून केंद्राने मार्गदर्शन मागविल्याचे सूत्रांनी सांगितले.

योजनेची स्थिती
१.५६ कोटी अपेक्षित लाभार्थी
५९.९३ लाख लाभार्थ्यांची माहिती अपलोड 
३७.१३ लाख अपात्र शेतकरी
१७१७.४० कोटी रु. पहिला हप्ता

निकषांनुसार पात्र शेतकऱ्यांना या योजनेचा लाभ मिळावा, याकरिता खातेदारांच्या याद्या प्रत्येक ग्रामपंचायतींमध्ये लावल्या जाणार आहेत. त्या अंतिम करण्याचे काम तलाठी, ग्रामसेवक, कृषी सहायकांवर सोपविण्यात आले आहे.
- हनुमंत शिंदे, तंत्र अधिकारी, कृषी आयुक्‍त कार्यालय, पुणे