निपाणी (बेळगाव) - हुडको कॉलनीतील बसवेश्वरनगरमध्ये  महेश रामलिंग फल्ले यांचे बंद घर फोडून अज्ञात चोरट्यांनी सुमारे सव्वा पाच लाख रुपयांचा ऐवज लांबविला. त्यात सुमारे 13 तोळे सोने, चांदी व रोख 37 हजार रुपयांचा समावेश आहे. गुरुवारी (ता. 20) रात्री उघडकीस आलेल्या घटनेची नोंद श्री. बसवेश्वर चौक पोलिस स्थानकात झाली आहे. अक्कोळ रोडवरील बसवेश्वर पोलिस स्थानकापासून हाकेच्या अंतरावरच चोरी झाल्याने आश्‍चर्य व्यक्त होत आहे. 

याबद्दल घटनास्थळावरुन मिळालेली प्राथमिक माहिती अशी, गुरुवारी (ता. 20) फल्ले हे नेहमीप्रमाणे कामानिमित्त चिक्कोडी न्यायालयात गेले होते. तर त्यांच्या पत्नी डॉ. विद्या महेश फल्ले या सायंकाळी घरापासून काही अंतरावर असणाऱ्या आपल्या दवाखान्यात गेल्या होत्या. मुले बाहेर खेळण्यासाठी गेली होती. रात्री 8.30 वाजण्याच्या सुमारास डॉ. फल्ले घरी आल्यावर चोरीची घटना उघडकीस आली. दरम्यान बसवेश्वर चौक पोलिसांनी भेट देऊन पाहणी केली. सायंकाळी 7 वाजण्याच्या सुमारास चोरट्यांनी घर फोडले असल्याचा अंदाज वर्तविण्यात आला आहे.

हेही वाचा - तो चिमणी बनून आगीवर नियंत्रण मिळवत राहिला... 

तिजोरीतील 'या' साहित्याची चोरी

अज्ञात चोरट्यांनी फल्ले यांच्या घराच्या पाठीमागील बाजूच्या दाराची कडी मोडून व दार कापून घरात प्रवेश केल्याचे दिसून येते. घरात प्रवेश केल्यावर अज्ञातांनी थेट तिजोरी फोडून साहित्य विस्कटून टाकले आहे. तिजोरीतील 13 तोळे सोने व किरकोळ चांदी होती, ती लांबवली आहे. शिवाय 37 हजार रुपयांची रोकडही होती. दागिने व रोखड चोरट्यांनी लांबवली आहे. प्रामुख्याने 4 तोळ्याच्या बांगड्या, 3 तोळ्याचे गंठण यासह लहान दोन गंठण, ब्रेसलेट, चेन, लहान अंगठ्या, पैंजण, जोडवी, करंडा, गणपती मूर्ती अशा दागिन्यांचा त्यात समावेश आहे.

हेही वाचा - खासगी बसमधून कोकणी मेवा नेण्यास बंदी 

सराईत चोरटा असण्याची शक्यता

आज (ता. 20) सकाळी पोलिस उपाधिक्षक मिथुनकुमार, मंडल पोलिस निरीक्षक संतोष सत्यनायक, उपनिरीक्षक बी. जी. सुब्बापूरमठ यांनी भेट देऊन पाहणी केली. त्यानंतर श्‍वान पथकासह ठसे तज्ज्ञांनी घटनास्थळी तपासणी केली. श्‍वान मात्र घराच्या पाठीमागील बाजुस घुटमळले. त्यामुळे या घटनेत सराईत चोरटा असण्याची शक्‍यता वर्तविण्यात येत आहे. 

परिसरात पोलिसांची निवासस्थाने

बसवेश्वरनगर, हुडको कॉलनी परिसरात अनेक पोलिस अधिकारी, कर्मचाऱ्यांची घरे आहेत. नजिकच पोलिस स्थानक आहे. तरीही येथे चोरीच्या वारंवार घटना घडत असल्याने भागाच्या सुरक्षेच्या प्रश्‍न ऐरणीवर आला आहे. चोरटे बंद घरे लक्ष्य करीत आहेत.