ढेबेवाडी (जि.सातारा)  : ग्रामदैवताच्या यात्रेनंतर बोकडांच्या मेजवानीने साजरी होणारी पाले जत्रा मेंढ (ता. पाटण) येथील गावकऱ्यांना मात्र भलतीच महागात पडली. कोरोनाच्या पार्श्वभूमीवर जमावबंदी असतानाही काल रात्री तेथे सुरू असलेल्या या यात्रेवर पोलिसांनी अचानक छापा टाकल्याने चुलींवर शिजणारे मटण तिथेच सोडून डोंगरातून सैरावैरा पळून जाण्याची वेळ गावकऱ्यांवर आली. याप्रकरणी पोलिसांनी 21 जणांवर गुन्हा दाखल केला असून, तीन दुचाक्‍यांसह पातेली व अन्य साहित्य जप्त करण्यात आले आहे.
 
कोरोनाच्या पार्श्वभूमीवर ग्रामदैवताची यात्रा ग्रामस्थांनी रद्द केली असली, तरी काल जमावबंदीतही त्यांनी तेथे पाले जत्रेनिमित्त केलेले बोकडांच्या मेजवानीचे नियोजन त्यांच्याच अंगलट आले. या यात्रेसाठी स्थानिकांसह अन्यत्र पुनर्वसित झालेले काही धरणग्रस्त ग्रामस्थ उपस्थित होते. मंदिराच्या परिसरात दगडांच्या चुलींवर मटण व भात शिजत असल्याची व तेथे गर्दीही झाल्याची माहिती येथील पोलिसांना मिळताच रात्री साडेआठच्या सुमारास सहायक पोलिस निरीक्षक उत्तम भजनावळे व त्यांचे सहकारी नवनाथ कुंभार, अशोक खवळे, गृहरक्षक दलाचे डाकवे व पानवळ आदींनी अचानक तेथे छापा टाकला. पोलिसांना समोर पाहाताच नैवेद्य दाखवायच्या तयारीत असलेल्या लोकांनी डोंगरातून, तसेच नदीतून पळ काढला. काही जण पोलिसांच्या तावडीत सापडले. 

या वेळी सरपंच अमित पाटील, पोलिस पाटील भगवानराव मत्रे यांच्या उपस्थितीत पोलिसांनी पातेल्यात शिजणारे मटण रस्सा, भात ओतून टाकला. पातेली, भांडी, तीन दुचाक्‍या आदी साहित्य जप्त करण्यात आले. याप्रकरणी 21 जणांवर विविध कलमांनव्ये गुन्हा दाखल केला असून, अनेक जण अंधारात पसार झाल्याचे व त्यांचीही माहिती काढण्याचे काम सुरू असल्याचे पोलिसांनी संगितले. गुन्हा दाखल झालेल्यांना नंतर न्यायालयात हजर केले जाणार असल्याचेही सांगण्यात आले.

पोलिस उपअधीक्षक अशोकराव थोरात यांनी येथे भेट देऊन याप्रकरणी माहिती घेतली व तपासकामी सूचना दिल्या. सहायक पोलिस निरीक्षक उत्तम भजनावळे तपास करत आहेत. 

अडचणीतील मुख्यमंत्र्यांच्या मदतीला बाबा धावले

सातारा : जिल्हा परिषद शाळांत प्रवेश घ्या ऑनलाइन

CoronaVirus : बाप रे ! महाराष्ट्रात सातारा सोळाव्या क्रमांकावर

Breaking : अर्थव्यवस्था पूर्वपदावर येण्यासाठी सकारात्मक पाऊल उचलावे : शिवेंद्रसिंहराजे