बेळगाव : शहर आणि परिसरात मंगळवारी (ता. १९) गणेशचतुर्थी (Ganesh Chaturthi) मोठ्या प्रमाणात साजरी होणार आहे. मात्र, राज्य सरकारने (Karnataka Government) सोमवारी (ता. १८) सुटी जाहीर केली आहे. त्यामुळे नेमकी सुटी कधी घ्यावी, असा संभ्रम शाळांसमोर (School) निर्माण झाला आहे.

सरकारने सुटीचा दिवस बदलावा, अशी मागणी होत आहे. काही शाळांनी सोमवारी शाळा सुरू ठेवून मंगळवारी सुटी घेण्याचा निर्णय जाहीर केला आहे. दरम्यान, याबाबत जिल्हा शिक्षाणाधिकाऱ्यांनी जिल्हाधिकारी नीतेश पाटील (Collector Nitesh Patil) यांच्याशी संपर्क साधला असता त्यांनी सरकारने जाहीर केल्याप्रमाणे गणेशचतुर्थीची सुटी सोमवारीच (ता. १८) जाहीर केल्याचे सांगितले.

त्यामुळे शाळांसह इतर सरकारी कर्मचाऱ्यांची अडचण होणार आहे. मंगळवारी गणेशचतुर्थी दिवशी सुटी देण्याऐवजी सोमवारी सुटी दिल्याने मुख्याध्यापकांनी गट शिक्षणाधिकाऱ्यांशी संपर्क साधून याबाबत माहिती घेण्याचा प्रयत्न केला.

मात्र, अद्याप तरी सुटीत बदल झाला नसल्याची माहिती शिक्षण खात्याच्या अधिकाऱ्यांकडून दिली जात आहे. शिक्षण खात्याकडून कोणत्याही प्रकारची अधिकृत माहिती मिळत नसल्याने काही शाळांनी मंगळवारी शाळांना सुटी देण्याचा निर्णय घेतला आहे.