सातारा : पदभार स्वीकारताच नवे जिल्हाधिकारी शेखर सिंह यांनी पहिल्याच दिवशी कामांचा धडाका लावला. स्वाइन फ्लूसह त्यांनी आरोग्य विभागाच्या कामाचा आढावा घेतला, तर सर्वसामान्यांच्या प्रश्‍नांना प्राधान्य देणार असल्याचे त्यांनी या वेळी स्पष्ट केले. 

हे वाचा - माझ्‍यासमोरच अंगणवाडी सेविकेचा खून

श्री. सिंह यांचे मुंबईहून आज दुपारी साडेचारच्या सुमारास साताऱ्यात आगमन झाले. शासकीय विश्रामगृहात थोडा वेळ थांबल्यानंतर ते थेट जिल्हाधिकारी कार्यालयात आले व त्यांनी पदभार स्वीकारला. या वेळी अतिरिक्त जिल्हाधिकारी रामचंद्र शिंदे यांनी त्यांचे पुष्पगुच्छ देऊन स्वागत केले. त्यानंतर मावळत्या जिल्हाधिकारी श्‍वेता सिंघल यांनी त्यांचे स्वागत केले. 

पदभार स्वीकारल्यानंतर श्री. सिंह यांनी श्‍वेता सिंघल यांच्याशी चर्चा करून जिल्ह्यातील नेमक्‍या परिस्थितीची माहिती घेतली. त्यानंतर श्री. सिंह यांनी विविध विभागांच्या कामाचा आढावा घेतला. या वेळी निवासी उपजिल्हाधिकारी सुनील थोरवे, प्रांताधिकारी मिनाज मुल्ला, कीर्ती नलावडे, संगीता चौगुले, अश्विनी जिरंगे, जिल्हा नियोजन अधिकारी बी. जे. जगदाळे, जिल्हा पुरवठा अधिकारी स्नेहा देवकाते, साताऱ्याच्या तहसीलदार आशा होळकर यांच्यासह अधिकारी उपस्थित होते. 

हेही वाचा - शुभमंगलचंही होईना मंगल!

प्रारंभी त्यांनी आरोग्य विभागाचा आढावा घेतला. त्यामध्ये त्यांनी स्वाइन फ्लू साथीच्या स्थितीची माहिती घेतली. त्यानंतर जिल्हाधिकारी कार्यालयातील सर्व अधिकाऱ्यांची ओळख करून घेत महसूलसह नियोजन विभागाचा आढावा घेतला. 

आवश्‍‍य वाचा - सागरिका कॅंटीनचा प्रयोग राज्यभर राबवू : मंत्री देसाई

प्रशासकीय अधिकारी व कर्मचाऱ्यांतील व्यसनाधीनता कमी करून त्यांच्यात जागृती करण्यावर भर देणार असल्याचे त्यांनी सांगितले. एक अजेंडा डोळ्यासमोर ठेऊन जिल्ह्याच्या शाश्‍वत विकासासाठी प्रयत्न करणार असल्याचे त्यांनी सांगितले. त्यासाठी तुम्हा सर्वांची मदत घेणार असल्याचे त्यांनी स्पष्ट केले. 

सिंधुदुर्गला असताना मी पर्यटक म्हणून साताऱ्यात येत होतो. येथील कास परिसराची भुरळ मला पडली होती. आता तर येथे काम करण्याची संधी मिळाली असून, सर्वसामान्यांच्या प्रश्‍नांना प्राधान्य दिले जाईल. यामध्ये पायाभूत सुविधांसह आरोग्य, शिक्षण यासोबतच इतर बाबींवर भर देणार आहे.

शेखर सिंह, जिल्‍हाधिकारी, सातारा