सातारा : येथील श्री उत्तर चिदंबरम नटराज मंदिरातील देवदेवतांचा वार्षिक रथोत्सव सोहळा आज कल्याणोत्सवाने समाप्त झाला. पाच ते दहा जानेवारीदरम्यान शेकडो शिवभक्तांच्या उपस्थितीत मोठ्या उत्साहाने विविध धार्मिक कार्यक्रम झाले.
 
कांची कामकोटी पीठाचे जगद्‌गुरू शंकराचार्य महास्वामी श्री श्री चंद्रशेखरेंद्र सरस्वती स्वामी यांच्या व महास्वामी श्री श्री जयेंद्र सरस्वती यांच्या कृपेने व परमपूज्य श्री श्री शंकर विजयेंद्र सरस्वती यांच्या आशीर्वादाने हा सोहळा होत असताना आज पहाटे 5 ते 12 या वेळेत श्री गणपती होम, चतुर्वेद पारायण होऊन पुणे येथील श्री राधाकृष्ण शास्त्री मेमोरियल ट्रस्टच्या वतीने श्री नटराज व शिवकामसुंदरी देवीस महाभिषेक करण्यात आला. या देवांचा लग्न सोहळा अर्थात कल्याणोत्सवाला शेकडो भाविक उपस्थित होते.

जरुर वाचा -  साताऱ्यात रंगणार सकाळ स्कूल क्रिकेट लीग
 
यावेळी नटराज मूर्तीस विविध फळांचा, भस्म, चंदन, अत्तर, दूध, दही, मध, साखर, तूप आदींचा अभिषेक घालण्यात आला. शिवकामिनी देवी (पार्वती) व आनंद नटराज यांचा कल्याणोत्सव होऊन या दोन्ही मूर्तींना वस्त्र, अलंकार, फुलांचे हार, लिंबाची माळ, चंदन हार आदींनी शृंगार करून या मूर्ती गाभाऱ्यात नेऊन महाआरती करण्यात आली.

त्यानंतर पारायण समाप्ती होऊन महाप्रसाद वाटप करण्यात आले. शेकडो भाविकांनी रांगा लावून प्रसाद घेतला. या रथोत्सवाच्या कार्यक्रमास सातारकर भाविकांनी उत्स्फूर्त प्रतिसाद दिला. पुढील महिन्यात होणाऱ्या महाशिवरात्री उत्सवाला असाच प्रतिसाद द्यावा, असे आवाहन नटराज मंदिराचे व्यवस्थापकीय विश्‍वस्त रमेश शानभाग यांनी केले.

हेही वाचा - Video : काळूबाईच्या नावानं चांगभलंने दुमदुमला मांढरगड