फौजदार चावडी पोलिसांचा छापा: चालकासह नऊ बारबालांना अटक

सोलापूर : केगाव परिसरातील हॉटेल पॅराडाईजमध्ये ऑर्केस्ट्रा बारच्या नावाखाली चालणाऱ्या डान्सबारवर फौजदार चावडी पोलिसांनी छापा टाकला. चालक सचिन जाधव, रोहित राहुल गायकवाड, वाद्य वाजविणारे किशोर अर्जुन बासपोर, जय मोतीलाल हलदार या चौघांसह नऊ बारबालांना अटक करण्यात आली आहे.

रविवारी (ता. 18) पहाटे अडीचच्या सुमारास फौजदार चावडी पोलिस ठाण्याचे दुय्यम पोलिस निरीक्षक शहाजी पवार आणि त्यांच्या पथकाने हा छापा टाकला. हॉटेल पॅराडाईजमधील ऑर्केस्ट्रा बारमध्ये महिला तोडके-मोडके कपडे घालून अश्‍लील नृत्य करून ग्राहकांना आकर्षित करीत असल्याचे दिसून आले. रेस्टॉरंट आणि ऑर्केस्ट्रा बारमध्ये नृत्य करण्यास बंदी असतानाही स्वतः:च्या आर्थिक फायद्यासाठी नृत्य करताना नऊ महिला सापडल्या. चालक सचिन जाधव हा पोलिसांना पाहून पळून गेला. तो नंतर पोलिसांना शरण आला. विना परवाना बार चालू ठेवून शासनाने ठरवून दिलेल्या वेळेच्या बंधनाचे उल्लंघन केल्याचेही फिर्यादीत म्हटले आहे. पोलिस नाईक निशिकांत नागनाथ जोंधळे यांनी फिर्याद दिली आहे. पोलिस निरीक्षक शहाजी पवार तपास करीत आहेत.

बाकीच्या डान्सबार कारवाई केव्हा?
हॉटेल पॅराडाईजमध्ये कधीपासून डान्सबार चालू होता हे माहिती नाही, माहिती मिळाल्यानंतर वरिष्ठ पोलिस निरीक्षक संजय जगताप यांच्या आदेशानंतर छापा टाकल्याचे पोलिस निरीक्षक शहाजी पवार यांनी सांगितले. पुणे रस्ता, बाळे परिसर आणि केगाव परिसरात अनेक ठिकाणी गुपगुपपणे डान्सबार चालू आहेत. डान्सबारकडे जाणीवपूर्वक दुर्लक्ष करणाऱ्या पोलिसांकडून बाकीच्या डान्सबारवर केव्हा कारवाई होणार असा सवाल जनतेमधून विचारला जात आहे.