सोलापूर : लॉकडाउन शिथिलीकरणामुळे येथील गणेश मूर्तिकारांना मोठा दिलासा मिळाला असून शुक्रवारपासून गोदामातील घरगुती छोट्या मूर्तींच्या रंगकामाला युद्धपातळीवर सुरवात झाली आहे. जुलै महिनाअखेरपर्यंत या मूर्ती तयार करून महाराष्ट्रासह आंध्र प्रदेश, तेलंगणा व कर्नाटकला रवाना करण्यात येणार आहेत. 

हेही वाचा ः सोलापुरात सात मृत्युसह ५३ पाॅझिटीव्ह

श्री गणेश चतुर्थी 22 ऑगस्टला आहे. गेल्या दिवाळीनंतर मूर्तिकारांनी दरवर्षीच्या मागणीप्रमाणे मूर्ती तयार करण्याच्या कामास संथगतीने सुरवात केली. मार्च महिन्याच्या मध्यावधीपर्यंत अनेक लहान घरगुती मूर्ती साच्यातून काढण्यात आल्या. एप्रिल महिन्यापासून रंगकामास सुरवात होणार तोच 22 मार्चपासून लॉकडाउन सुरू झाल्याने सर्वच काम ठप्प झाले होते.

हेही वाचा ः कृषी मंत्र्यांनी लक्ष द्यावे

आता शुक्रवारपासून लॉकडाउन शिथिल झाल्याने मूर्तिकारांना सकाळी नऊ ते दुपारी पाचपर्यंत वेळ मिळाला आहे. मात्र ही वेळ अपुरी असून, वेळ वाढवून देण्याची मागणी मूर्तिकारांनी "सकाळ'शी बोलताना केली. 

हेही वाचा ः त्या महिलेच्या संपर्कातील आठजण क्वारंटाईन

सहा इंची ते तीन फुटी मूर्तींवर भर 
कोरोना विषाणूच्या वाढत्या प्रादुर्भावामुळे यंदा मोठ्या गणेश मंडळांनी साध्या पद्धतीने उत्सव साजरा करण्याचे ठरवले आहे. त्यामुळे मोठ्या मूर्तींना अद्यापपर्यंत मागणी नसल्याने मूर्तिकारांनी घरगुतीसाठी सहा इंची ते तीन फुटांच्या मूर्ती तयार करण्यावर भर दिला आहे. 

कोरोनामुळे यावर्षी मोठ्या प्रमाणात मूर्ती बनवण्यासाठी वेळ अपुरी आहे. 40 हजार लहान मूर्तींचे लक्ष्य होते मात्र आता 30 हजारांपर्यंतच मूर्ती तयार होतील असे वाटते. प्रशासनाने मूर्तिकारांना वेळ वाढवून द्यावी, जेणेकरून वेळेत सर्व ऑर्डरी पूर्ण करता येतील. 
- नरेश दुंपेटी, मूर्तिकार