सोलापूर : लॉकडाउनमुळे अडीच महिने बंद असलेला प्रिंटिंग प्रेस व्यवसाय लॉकडाउन शिथिलीकरणामुळे 8 जूनपासून सुरू झाला. यामुळे मालक व कामगारांमध्ये उत्साहाचे वातावरण होते. मात्र, बाजारात अजूनही मंदीसदृश परिस्थिती असल्याने 85 टक्के व्यवसाय घटला आहे. त्यामुळे कामगार व मालकांमध्ये पुन्हा मरगळ आली आहे. 

हेही वाचा : भांडवलदारांना सवलती देताना देश आर्थिक संकटात नसतो का? 

लॉकडाउन काळात झाले मोठे नुकसान 
पुणे, मुंबई यासह आंध्र प्रदेश, तेलंगण व कर्नाटकातील अनेक जिल्ह्यांतील छपाईची कामे सोलापुरात होत असल्याने प्रिंटिंग हब म्हणून सोलापूरची ओळख आहे. लॉकडाउनमुळे 200 प्रेस, शेकडो स्क्रीन प्रिंटर्स व सहा हजार कामगारांवर बेरोजगारीची कुऱ्हाड कोसळली होती. कोट्यवधींची गुंतवणूक केलेल्या मोठ्या व्यावसायिकांसह छोट्या व्यावसायिकांचेही मोठ्या प्रमाणात नुकसान झाले. त्याचबरोबर या व्यवसायातील थेट काम करणारे एक हजार 200 कामगार व या व्यवसायाशी निगडित डीटीपी ऑपरेटर, बाईंडिंग, पाकिटे तयार करणारे असे जवळपास सहा हजार कामगार बेरोजगार झाले होते. अडीच महिन्यांपासून मशिनरी थांबून असल्याने त्याचे स्पेअर पार्ट खराब झाले. शाई, केमिकल वाळून गेल्याने जवळपास प्रिंटिंग प्रेस व्यावसायिकांना दोन कोटींहून जास्त फटका बसला. 

हेही वाचा : वाढत्या हिरवाईमुळे प्रदूषण रोखण्यात यश 

कामगार मानताहेत अर्ध्या रोजगारावर समाधान 
आता लॉकडाउन शिथिलीकरणात यंत्रमाग उद्योगातील निर्यातदारांकडून टॉवेल लेबल, टॅग, पॅकिंग साहित्याची कामे व हॉस्पिटलसंबंधित कामे थोड्याफार प्रमाणात सुरू आहेत. दळणवळण बंद असल्याने इतर राज्यांतील व जिल्ह्यांतील कामे मिळण्यास अडचणी आहेत. शाळा- महाविद्यालयांची व शासकीय तसेच व्यावसायिक संबंधित कामेही सुरू नाहीत. केवळ 10 ते 15 टक्के कामांसाठी प्रिंटिंग प्रेस सुरू ठेवावे लागत आहेत, तेही केवळ चार तासांसाठी. यामुळे कामगारांनाही अर्ध्या पगारावर समाधान मानावे लागत आहे. 

व्यवसाय सावरायला लागेल एक-दीड महिना 
लॉकडाउननंतर प्रिंटिंग प्रेस सुरू झाले, मात्र कामेच नाहीत. शाळा-महाविद्यालये सुरू झाल्यास कामांना वेग येईल मात्र शाळा कधी सुरू होतील याबाबत ठोस माहिती नाही. शासकीय व कमर्शिअल कामेही बंद असल्याने व्यवसाय अजून सावरला नाही. त्यासाठी आणखी एक-दीड महिना जावा लागेल. निदान व्यवसाय सुरू झाला यावरच सध्या आम्ही समाधान मानत आहोत. 
- नागेश शेंडगे, 
उपाध्यक्ष, सोलापूर मुद्रक संघ