अक्कलकोट (सोलापूर) : अक्कलकोट तालुक्‍यात आज बुधवारी एकाच दिवसात कोरोनाबाधित रुग्णांच्या संख्येने विक्रमी पल्ला गाठला असून, सलग दुसऱ्या दिवशी एकूण 30 रुग्ण आढळले आहेत. यात रॅपिड टेस्टचे 29 तर स्वॅब टेस्टचा एक रुग्ण पॉझिटिव्ह आढळल्याची माहिती तहसीलदार अंजली मरोड यांनी दिली. 

हेही वाचा : रिक्षाचालकाची आत्महत्या; "लाल बावटा'ने केली मागणी : मुख्यमंत्री सहाय्यता निधीतून "एवढ्या' लाखांची मदत करा 

अक्कलकोट तालुक्‍यात एकूण रुग्णांची संख्या 226 इतकी झाली असून, आतापर्यंत अक्कलकोट शहरात आठ व ग्रामीणमध्ये दोन असे दहाजणांचा मृत्यू झाला आहे. 95 बाधित बरे झाले असून 121 बाधितांवर उपचार सुरू आहेत. यामध्ये अक्कलकोट शहरातील 51 व ग्रामीण भागातील सात बाधितांवर उपचार सुरू आहेत. रॅपिड अँटिजेन टेस्टमधून चार दिवसांत एकूण 63 रुग्ण पॉझिटिव्ह आढळले. त्यामध्ये बुधवारी 29 रुग्ण आढळले आहेत. त्यात अक्कलकोट शहरातील भारत गल्लीतील एक, खासबाग गल्लीतील एक, विजयनगर पाच, माणिक पेठ एक असे आठ रुग्ण हे रॅपिड अँटिजेन टेस्टमध्ये तर ग्रामीण भागातील किणी एक, समर्थनगर एक, मैंदर्गी 19 अशा प्रकारे 21 रुग्णांचा समावेश आहे. याप्रमाणे रॅपिड अँटिजेन टेस्टमधून बुधवारी अक्कलकोट शहरात आठ तर ग्रामीण भागात 21 असे एकूण 29 रुग्ण वाढले आहेत. त्याचप्रमाणे स्वॅब अहवालामधून किणी येथील एक रुग्ण आढळून आला आहे. दररोज तालुक्‍यातील अनेक नवीन गावांत कोरोनाबाधित रुग्ण आढळून येत असल्याने व संख्या द्विशतकाच्या पार गेल्याने भीतिदायक वातावरण निर्माण झाले आहे. बुधवारी केलेल्या 92 रॅपिड अँटिजेन टेस्टमधून 29 पॉझिटिव्ह रुग्ण आढळले आहेत. 

हेही वाचा : चहापेक्षा किटली गरम ! शहरातील उद्योगांना मिळाली सशर्त परवानगी; पण उद्योजक म्हणतात... 

पुन्हा लॉकडाउनमुळे नागरिक व व्यापाऱ्यांमध्ये नाराजी 
अक्कलकोटला मागील आठवड्यात जनता कर्फ्यू होता, त्यामुळे सर्व व्यापारी व नागरिकांची बाजार करण्यासाठी सर्वत्र प्रचंड गर्दी उसळली आहे. नागरिकांची धडपड पाहिली तर कोरोनाची ना भय ना चिंता दिसत आहे. आता लगेच शुक्रवारपासून जिल्हाधिकाऱ्यांच्या आदेशाने कडक लॉकडाउन सुरू होणार आहे, तेही दहा दिवस. त्यामुळे व्यापारी व नागरिकांमध्ये नाराजी व्यक्त होत आहे. अक्कलकोटला मागील 24 मार्चपासून बोटावर मोजण्याइतके दिवस दुकाने सुरू होती, त्यामुळे मोठे नुकसान सोसावे लागत आहे. 

संपादन : श्रीनिवास दुध्याल